Төркиядә коткаручылар җир тетрәүдән соң алтынчы көнне дә исән калган кешеләрне таба
Төркиядә коткаручылар җир тетрәүдән соң алтынчы көнне дә исән калган кешеләрне җимерекләр астыннан чыгаруны дәвам итә. Бу хакта ТАСС агентлыгы җирле гаммәви мәгълүмат чараларына сылтама белән яза.
Mynet яңалыклар порталы мәгълүматлары буенча, табигый бәла-казадан соң 150 сәгать узгач Хатай провинциясендә бер кызны коткарганнар. Аның төгәл яше билгеле түгел, коткаручылар аңа ике яки өч яшь булырга мөмкин, дип фаразлый.
Hürriyet газетасы билгеләп үткәнчә, эзләү-коткару операциясенең 149нчы сәгатендә шул ук Хатай провинциясендә җимерекләр астыннан эпилепсия белән авыручы Мостафа исемле 35 яшьлек ир-атны чыгарганнар. Аны, урында беренче ярдәм күрсәткәннән соң, хастаханәгә озатканнар.
Yeni Şafak газетасы язуынча, операциянең 140нчы сәгатендә Хатайда көмәнле хатын-кыз һәм аның туганын коткарганнар. Аларның тормышына бернинди куркыныч та янамый, икесен дә хастаханәгә алып киткәннәр.