Татарстанда узган ел 33 бала туберкулез йоктырган
Татарстанда 2022 елда утыздан артык бала туберкулез белән авырган. Бу хакта «Татар-информ»дагы матбугат конференциясендә Татарстан Сәламәтлек саклау министрлыгының баш балалар фтизиатры, республика Туберкулезга каршы диспансерның баш табибы урынбасары Рәмзия Фатыйхова сөйләде.
«Узган елда Татарстанда 972 кеше туберкулез йоктырган, шуларның 33е – бала. Татарстан Республикасында 57 кеше туберкулездан үлде», - диде ул.
Ел саен өч мең балада латент туберкулез инфекциясе ачыклана, дип өстәде Рәмзия Фатыйхова.
Роспотребнадзорның Татарстан Республикасы буенча идарәсенең территорияне санитар саклау бүлеге башлыгы Анна Алешина сүзләренчә, 14 яшькә кадәр 26 бала һәм 7 яшүсмер бу чир белән авырган.
Моннан тыш, узган ел өч меңгә якын бала туберкулезга тест узмаган. Алар Манту яки Диаскинтест ясатмаган.