«Алга» батальонында хезмәт итүче күп балалы хәрбинең гаиләсенә автокресло тапшырдылар
Үз теләге белән хәрби хезмәттә булган «Алга» батальоны вәкиле Урал Мәхмүдовның күп балалы гаиләсенә «Юл хәрәкәте иминлеге» дәүләт бюджет учреждениесе һәм ЮХИДИ вәкилләре «Бала – баш пассажир» акциясе кысаларында автолюлька тапшырды. Хәрби хезмәткәргә юлда имин йөртү җайланмасын Россия Эчке эшләр министрлыгының Менделеевск районы буенча бүлегенең ЮХИДИ идарәсе җитәкчесе вазифаларын вакытлыча башкаручы, полиция капитаны Алмаз Сафин тапшырды.
Менделеевск районының матбугат хезмәтендә «Татар-информ»га хәбәр итүләренчә, Урал Мәхмүдов яраланып, туган ягына кайткан.
Искәртеп узабыз, 2022 елның 16 декабрендә хәрбинең бишенче баласы – кызы Ансария туган. Район башлыгы Радмир Беляев гаиләне кызлары тууы белән котлады.
Калган дүрт балага яктылык кайтара торган аяк киеме сумкалары, мәктәптә кирәкле әсбаплар, юл хәрәкәте кагыйдәләре язылган ярдәмлекләр тапшырылды.