Владимир Путин Менделеевскидан хәрби хезмәткәргә шәхси табель коралы бүләк итте

Россия Президенты Владимир Путин Менделеевскида туган лейтенант Данат Насыйбуллинны бүләкләде. Дәүләт башлыгы хәрбигә Ярыгин пистолеты һәм фрак билгесе - РФ Президенты штандартын тапшырды. Бу турыда «Татар-информ» хәбәр итте.

Яңа елның беренче көнендә Владимир Путин Ново-Огарёвода махсус хәрби операциядә катнашучылар белән очрашты, алар төшке аш вакытында аралашты. Президент сүзләренчә, бу «көнкүреш, дустанә очрашу».

Владимир Путин очрашуда катнашучыларның барысына да бүләкләр әзерләве турында әйтте, алар арасында югарыда телгә алынган шәхси табель коралы һәм Президент штандарты да бар иде.

«Төшке аш азагында сезгә табель шәхси коралы тапшырылачак. Һәм мин дәүләт бүләге түгел, шул ук вакытта һәрвакыт үзең белән, өстәвенә, теләсә нинди киемдә йөртергә мөмкин булсын өчен, тагын нәрсә уйлап табарга икән дип уйладым. Һәм, миңа калса, яхшы уйлап таптым: шундый кечкенә президент штандарты, билге дөрес металлдан ясалган, бик матур, безнең осталар Ярославльдә ясаган. Минемчә, сезгә ошаячак», - диде Владимир Путин.

23 яшьлек Данат Насыйбуллин Менделеевскида туган, Казан танк училищесын тәмамлаган. «За боевые отличия» медале һәм Суворов медале белән билгеләп үтелгән, ә хәзер шәхси корал - Ярыгин пистолеты белән бүләкләнде.

«Декабрьдә генә ялда булды, гуманитар ярдәм җибәрүдә катнашты. Ул безнең горурлыгыбыз, танк училищесын тәмамлаган, чын сугышчы! Данат Алмаз улын һәм аның әти-әнисен чын саклаучы тәрбияләүләре белән котлыйбыз», - дип билгеләп үтте Менделеевск районы башлыгы Радмир Беляев Телеграм-каналында һәм хәрбигә сәламәтлек теләде.