Кар яву сәбәпле, Миңнеханов Татарстан халкына шәһәрдән читкә китеп йөрмәскә киңәш итте
Республика юлларында начар һава шартлары аркасында килеп туган хәлгә Татарстан Республикасы Рәисе Рөстәм Миңнеханов үзенең Telegram-каналында аңлатма биргән һәм шәһәрара трассаларның берсендә булган вазгыятьне сурәтләгән видео урнаштырган.
«Һава торышы аркасында бүген республикабызда вазгыять катлаулы. Коммуналь хезмәтләр хезмәткәрләре буран һәм кар яву нәтиҗәләрен киметергә тырыша. Бигрәк тә шәһәр читендә трассаларда катлаулы хәл килеп чыкты», — дигән Татарстан Рәисе.
«Якындагы ял көннәрендә һава торышы үзгәрмәячәк, кирәкмәсә, юлларга һәм бигрәк тә шәһәрдән читкә чыкмагыз, иң яхшысы — ял көннәрен гаиләгез белән өйдә үткәрегез», — дип киңәш итә Рөстәм Миңнеханов.
«Бу кыш үз көчен күрсәтә. Бергә булыйк, ярдәм итегез, үзегезне саклагыз!» —дип тәмамлый ул.