Чиләбе татарлары «Кыш бабай остаханәсе - 2024» Яңа ел бәйгесе җиңүчеләрен билгеләде
Чиләбе өлкәсендә «Кыш бабай остаханәсе - 2024» Яңа ел бәйгесенә нәтиҗә ясадылар. Бу хакта Чиләбе өлкәсе татарлары конгрессының «ВКонтакте» социаль челтәрендәге төркемендә хәбәр ителә.
Бәйгегә «Декоратив-гамәли сәнгать», «Яңа ел талисманы - «Яшел аждаһа-2024» һәм «Сәхнә осталыгы» номинацияләре буенча нәтиҗәләр ясалды. Җиңүчеләргә – грамоталар, конкурста катнашучыларга сертификатлар 2024 елның 1 февраленә кадәр тапшырылачак. Исемле грамоталар һәм сертификатлар заявкада күрсәтелгән электрон почта адресына электрон рәвештә җибәрелә.
«Конкурска утыздан артык эш килгән. Алар барысы да дулкынландыргыч, сөйкемле һәм хикмәтле итеп ясалган. Бәйгегә килгән эшләр арасында яңа ел символы – татар аждаһасы да (Зилант), Кар бабай да, чыршы һәм кар бөртекләре дә бар иде», диелә бу хәбәрдә.
- Җиңүчеләр исемлеген сылтама аша карап була.
Аларны ясау өчен төрледән-төрле материаллар – кәгазь, катыргы, пластик, пенопласт, йон, һинд сүсе, ука һәм хәтта кар да кулланылган.
«Шулай ук аждаһага багышланган шигырьләрне сәнгатьле итеп укучылар арасында җиңүчеләрне билгеләү дә җиңел булмады, чөнки һәр иҗади номер үзенчәлекле иде», – ди оештыручылар.
«Кыш бабай остаханәсе - 2024» онлайн-бәйгесе һәркемгә яңа ел кәефе бүләк итте. «Катнашучыларның барысына да рәхмәт белдерәбез һәм 2024 елда да безне яңа уңышларыгыз белән куандыруыгызны дәвам итәрсез дип өметләнәбез», - диелә хәбәрдә.