Петербург татарлары «Җәлил-квиз» викторинасына чакыра
18 февральдә 16.00 сәгатьтә бөек татар шагыйре Муса Җәлилнең тормышы һәм иҗатына багышланган 20 сораудан торган онлайн квиз-викторина узачак. Бу хакта Санкт-Петербург татарларының piter.tatar порталы хәбәр итә.
«Җәлил-квиз» викторинасында теркәлү һәм катнашу өчен адрес: https://play.myquiz.ru/i/00600380
«Уен башлануга, сезгә сорау һәм җавапның берничә вариантын күрсәтәчәкләр, кирәкле вариантны сайлап алу өчен җавапка бер минут вакыт бирелә. Бер дөрес җавапны сайлап алырга кирәк. Җавап вариантын сайлап алганнан соң «Җавап бирергә» кнопкасына басарга. Дөрес җавап биргән беренче өч уенчы өстәмә очко ала. Уен ахырында сезгә Лидербордны – иң күп балл җыйган уенчылар исемлеге – күрсәтәчәкләр», дип аңлаталар уен тәртибен.
Очколар тигез булса, соңгы сорауга иң тиз җавап биргән уенчы җиңә. Беренче өч урынга лаек булучыларны бүләкләр көтә, диелә хәбәрдә.