Россия Президентын сайлауда дистанцион электрон тавыш бирү өчен 3 млн кеше гариза биргән
Мартта Россия Президенты сайлауда дистанцион электрон тавыш бирүдә катнашу өчен 3 миллионнан артык кеше гариза биргән. Бу хакта ТАСС Россия Цифрлы үсеш, элемтә һәм массакүләм коммуникацияләр министрлыгына сылтама белән хәбәр итә.
«Өйдән яки офистан чыкмыйча, Президент сайлавында катнашу өчен дистанцион электрон тавыш бирүдә катнашуга гаризаны 11 мартта 23.59 сәгатькә кадәр бирергә була», - диделәр министрлыкта. Бу мөмкинлектән Россиянең 28 төбәгендә яшәүчеләр файдалана ала, бигрәк тә Мәскәү, Ростов, Свердловск өлкәләре, Алтай крае һәм Чувашиядән гаризалар күп килгән.
Дистанцион электрон тавыш бирү платформасында тавыш бирү 15 мартта 8.00 сәгатьтән 17 март 20.00 сәгатькә кадәр дәвам итә. Россиянең һәр төбәгендә җирле вакыт буенча узачак.
Россия Федерациясе Президентын сайлау 8нче тапкыр үткәрелә, быел ул 15, 16 һәм 17 мартта уза. Сайлауга 4 кандидатны - Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм Россиянең хәзерге Президенты Владимир Путинны (үзен-үзе тәкъдим итүче) керттеләр.