Баулы районының Татар Томбарлысы авылында сайлаучыларны чәй табыны белән каршы алганнар
15 мартта Баулы районының Татар Томбарлысы мәдәният йортында урнашкан 1045нче сайлау участогына килүчеләрне чәй табыны белән каршы алганнар. Бу турыда «Баулы-информ» яза.
«Авылдашларыбызны самавардан чәй, татар халык ашлары белән сыйладык», – дип хәбәр итте участок сайлау комиссиясе әгъзасы Айгөл Нәүрүзбаева.
Биредә 487 сайлаучы исәпләнә, 5се – беренче тапкыр тавыш бирүче яшьләр. Традиция бу, участок сайлау комиссиясе рәисе Рәмзия Сәмигуллина аларга бүләкләр тапшырган.
Айгөл Нәүрүзбаева сөйләвенчә, томбарлылар бик актив: кичке сәгать 7гә булган мәгълүматка караганда, сайлаучыларның 50 проценттан артыгы тавыш биргән.
«Сайлау участогына килә алмаучыларны өйләренә барып сайлаттык», – дип сөйләде Айгөл Нәүрүзбаева.
- Россия Федерациясе Президентын сайлау 8нче тапкыр үткәрелә, быел ул 15, 16 һәм 17 мартта уза. Сайлауда 4 кандидат - Владислав Даванков («Яңа кешеләр» партиясеннән), Леонид Слуцкий (ЛДПР партиясеннән), Николай Харитонов (КПРФ партиясеннән) һәм Россиянең хәзерге Президенты Владимир Путин (үзен-үзе тәкъдим итүче) катнаша.