Татарстан Хезмәт министрлыгы: Гаиләләргә ярдәм итү комплекслы программалары кабул ителә
Россия һәм Татарстанда тормыш сыйфаты, демография һәм гаиләләрнең иминлеге мәсьәләләре аеруча актуаль. Әлеге мәсьәләләргә һәрьяклап дәүләт ярдәме күрсәтелә. Бу хакта бүген Төбәк белән идарә итү үзәгендәге туры эфирда ТР хезмәт, мәшгульлек һәм социаль яклау министры Эльмира Зарипова хәбәр итте, дип яза «Татар-информ» хәбәрчесе Наталья Рыбакова.
«Илдә комплекслы программалар кабул ителә. «Демография» илкүләм проекты бала туудан, хәтта баланы планлаштырудан башлап (яшь парларның репродуктив сәламәтлеге һәм сәламәтлек саклау системасының үсеше турында әйткәндә) барлык гаилә тормышының аспектларын үз эченә ала. Киләсе этап - баланың мәктәпкә баруы. Мәгариф системасын үстерү буенча зур программалар гамәлгә ашырыла. Республикада ел саен яңа мәктәпләр һәм балалар бакчалары сафка баса», - диде ул.
Спикер Россия Президенты Владимир Путинның Федераль Җыенга юлламасында гаиләләргә ярдәм итү мәсьәләсенә аерым игътибар бирелүен билгеләп үтте. Һәм бу социаль ярдәм чаралары һәм акчалата ярдәм генә түгел, ә гаиләләргә сәләтләрен күрсәтү, хезмәт күрсәтү, эшкә урнашу мөмкинлеге бирү дә.
Шуңа күрә аерым илкүләм «Кадрлар» проекты барлыкка килде. Әби-бабайлар яшәгән күп буынлы гаилә турында сөйләгәндә, өлкән яшьтәге кешеләрнең актив озын гомерлелеге турында сорау туа. Шул сәбәпле өлкән кешеләргә багышланган аерым программа барлыкка килә», - диде Зарипова.
- Искәртик, 2023 елның 22 ноябрендә Президент Владимир Путин имзалаган указ нигезендә 2024 ел Россиядә Гаилә елы итеп игълан ителде. Документта билгеләп үтелгәнчә, карар гаиләне яклау һәм традицион кыйммәтләрне саклау өлкәсендә дәүләт сәясәтен популярлаштыру өчен кабул ителгән.
- Илкүләм проектлар Россиядә Президент Владимир Путинның «май указлары» нигезендә 2019 елдан гамәлгә ашырыла. Алар «Сәламәтлек саклау», «Мәгариф», «Экология», «Демография», «Фән», «Мәдәният», «Торак һәм шәһәр мохите» кебек илнең стратегик үсешенең 10 юнәлешен колачлый. 29 февральдә, Федераль Җыенга юллама белән чыгыш ясаганда, дәүләт башлыгы «Кадрлар», «Россия яшьләре», «Озын һәм актив тормыш», «Гаилә» һәм «Белешмәләр икътисады» яңа милли проектларын анонслады.