Мәскәү мөфтие: Диния нәзарәте Россиядә никаб кию мәсьәләсе турында сөйләшергә әзер

Россия мөселманнары Диния нәзарәте хакимиятләр белән илдә никаб кию темасына сөйләшергә әзер, әмма аны киюне пропагандаламаячак. Шул ук вакытта дин белгечләренең традицион позицияләрен цензурага дучар итү омтылышларын дөнья мөселман җәмәгатьчелеге аңламаска мөмкин. Бу хакта Диния нәзарәте рәисе урынбасары, Мәскәү мөфтие Илдар Галәветдинов сөйли.

«РФ мөселманнары Диния нәзарәте белгечләре советы әңгәмәгә ачык һәм никаб киюгә бәйле мәсьәләләр турында хакимият вәкилләре белән сөйләшергә әзер», - дип спикер цитатасын китерә ТАСС.

Галәветдинов билгеләп үткәнчә, бу тема һәрвакыт бәхәсле булган һәм бәхәсле булып кала. Ислам галимнәре никаб турында төрлесен әйтә: нейтральдән мәҗбүригә кадәр, ди ул.

Әмма бер генә Ислам галиме дә никаб киюне ярамый торган яки тыелган дип беркайчан да әйтмәгән. Хатын-кызларның ябык кием киюе күп халыкларда традиция булып тора, һәм бу Исламга кадәр үк таралган.

Искәртик, моңа кадәр Кеше хокуклары буенча совет башлыгы Валерий Фадеев «Парламентская газета»га биргән интервьюсында Россиядә никабны тыю яхшырак дип әйтте. Бу теманы ул традицион Ислам һәм төбәк хакимиятләре вәкилләре белән күтәрергә теләде.

• Никаб – күзләр өчен тар тишек кенә калдырып йөзне каплый торган традицион хатын-кызлар баш киеме. Кагыйдә буларак, кара төстәге тукымадан эшләнә.