2025 елда Татарстанда 3,26 миллион квадрат метр торак тапшырылачак
2025 елга Татарстанда торакны файдалануга тапшыру буенча минималь план 3,26 млн квадрат метр тәшкил итәчәк. Бу хакта ТР Хөкүмәте йортында узган шимбә киңәшмәсендә Татарстан төзелеш, архитектура һәм торак-коммуналь министры Марат Айзатуллин сөйләде.
ТР Рәисе матбугат хезмәтендә хәбәр итүләренчә, киңәшмәне Татарстан Премьер-министры Алексей Песошин үткәргән.
Айзатуллин ачыклык керткәнчә, быел Татарстанда торак төзелеше өлкәсендә дүрт программа гамәлгә ашырылачак. Күрсәтелгән күләмнең 1,416 млн квадрат метрын шәхси торак төзелеше линиясе буенча төзеләчәк, 1,683 миллион кв.метры күп фатирлы инвестторак була һәм 162 меңен социаль ипотека программасы буенча файдалануга тапшырырга планлаштыралар.
Шулай ук гражданнарның аерым категорияләрен торак белән тәэмин итү программалары кысаларында да эш дәвам итә.