Раддия: метрода йўл ҳақи туширилиши кутилмайди
Аввалроқ, маҳаллий ОАВларда Тошкент метрополитенининг йўл ҳақи 1200 сўмдан 820 сўмга туширилиши ҳақида хабарлар урчиганди. Компаниянинг баёнотида таъкидланишича, «Халқаро пресс клуб сессиясида сўзга чиққан мутахассисларнинг сўзлари нотўғри тушунилган ва талқин қилинган».
«Ўтган йили Вазирлар Маҳкамасининг қарорига мувофиқ, Тошкент аҳолиси ва меҳмонларига қулайлик яратиш, шунингдек, шаҳар йўловчи ташиш транспортлари харажатларини тежаш мақсадида 1 октябрдан метро ойлик йўл чипталари қайтадан жорий қилинган эди. Ойлик йўл чипталаридан фойдаланувчилар учун имтиёз ўтган йили ўрнатилган ва ҳозирда ҳам амалда бўлган йўлкира нархининг(1200 сўм) 23 фоизини ташкил этади. Шундан келиб чиқиладиган бўлса, ойлик йўл чиптасининг эгаси йўлкира учун 924 сўм тўлайди», — дейилади компаниянинг хабарида.
Халқаро пресс клубнинг Тошкент метрополитенини ривожлантиришга бағишланган сессияси 2017 йилнинг 2 ноябрида бўлиб ўтган эди. Соҳа мутахассислари журналистларни қизиқтирган саволларга жавоб берган. «Бироқ интернетдаги янгиликлар лентасини мониторинг қилиш натижасида маълум бўлдики, бир қатор журналистлар тақдим этилган маълумотларни нотўғри талқин қилган ва бу орқали жамоатчиликка ёлғон маълумот тарқатган. Нотўғри талқин ва чоп этиш — танганинг бир томони. Бу каби ёлғон маълумотлар интернет нашрларининг янгиликлар контентида «айланиб» юриши ва бу орқали ҳақиқатни ўзгартириб, йўловчиларни ёлғон ваъдага ишонтириб қўйиши бошқа масала», — дея таъкидланади хабарда.