Гўзаллик ва латофат: Тошкентда мода ҳафталиги бошланди

Бугун Тошкентда анъанавий миллий матолар ва улардан тикилган буюмларнинг ёрқин мода ҳафталиги очилди.

"Осиё рамзи" Ўзбекистон дизайнерлар ва модельерлар уюшмаси томонидан "Ўзбекипаксаноат" уюшмаси ва бошқа ташкилотлар кўмагида ташкил этилган мазкур ҳафталикнинг очилишига енгил саноат корхоналарининг вакиллари, либос дизайнерлари, олий ўқув юртларининг талабалари, чеварлар таклиф этилди.

"Осиё рамзи" Ўзбекистон дизайнерлар ва модельерлар уюшмаси раиси Ҳ.Комилова, Италия Республикасининг мамлакатимиздаги Фавқулодда ва мухтор элчиси Андреа Бертоцци, Франция элчихонаси маслаҳатчиси Изабель Кельбель ва бошқалар Тошкент мода ҳафталиги тадбири Ўзбекистон ҳамда турли хорижий давлатлар дизайнерларининг ўзаро фикр алмашишида ўзига хос ижодий мулоқот майдони вазифасини ўташини таъкидлади.



Мамлакатимизда мода индустриясини ривожлантириш, ички ва ташқи бозорларда рақобатбардош тайёр маҳсулотларнинг янги моделларини яратиш, халқимизга дунё талабларига жавоб берадиган либослар намуналарини тақдим этиш юзасидан тизимли ишлар амалга оширилмоқда. Айни пайтда хорижий дизайнер ва модельерлар билан узлуксиз, самарали ҳамкорликни ўрнатиш, замонавий ўзбек либосларини дунё миқёсида тарғиб этишга катта эътибор қаратилмоқда.

– Ўзбек матолари ўзининг экологик тозалиги, жаҳон андозалари талабларига мослиги билан ном қозонган, – дейди "Ўзбекипаксаноат" уюшмасининг тайёр маҳсулотлар дизайнини ривожлантириш ва экспорт бўлими бошлиғи Умида Узоқова. – Мода ҳафталигида матоларимиз, либослар дизайнига оид эришган ютуқларимизни тўлақонли намойиш этиш имконияти пайдо бўлди.

– Бу ҳафталикка таклиф этилганимдан ғоят мамнунман, – дейди италиялик дизайнер Антонио Гримальди. – Ўзбек миллий матолари, улардан тайёрланган либослар рангининг бетакрорлиги, бичими, ташқи кўриниши, кўркамлиги билан мени ғоят мафтун этди.



Мода ҳафталиги юртимиз ва хорижлик дизайнерларнинг ижоди билан яқиндан танишиш, уларнинг ўзаро фикр ва тажриба алмашиши учун имкон яратиш, ёш дизайнерлар, модельерларнинг билим ва кўникмаларини янада бойитишдек мақсадларни кўзлайди.


Ҳафталик ўзбек миллий ва замонавий матолари кўргазмаси ҳамда миллий либосларимиз намойиши билан бошланди.

Италияликлардан ташқари, ҳафталикда ўз коллекцияларини Франция, Корея, Қирғизистонлик усталар намойиш этишади. Улар билан 18 ноябрь куни танишиш мумкин .

Ҳафталик 19 ноябрь куни анъанавий кўргазма – “Миллий либос” фестивали намойиши билан тугайди.
Бутун ҳафта давомида маҳаллий ва хорижий модельерларь ёш дизайнер ва профессионаллар учун мастер-класслар ўтказишади.