ПФЛ директори 12 жамоали тизимга шошилинч ўтилиш сабабига изоҳ берди
Профессионал футбол лигаси Бош директори Омонжон Ғофуров Олий лигада 2018 йилдаёқ 12 жамоали тизимга ўтилишига изоҳ берди.
«Кўпчиликда Олий лигадаги ислоҳотлар нега 2019 йилдан эмас, келаси йилданоқ қўлланилди, деган саволлар туғилди. Лекин бир нарсани ҳисобга олиш керакки, агар бу ўзгаришларни 2019 йилда қилганимизда ҳам хозир аутсайдер бўлиб турган жамоалар ҳозиргидек охирги ўринларда юраверган бўларди. Биз шунчаки 1 йилни йўқотган бўлардик.
Тўғри ҳозир қайсидир жамоалар бу қарордан норози бўлиши мумкин. Мухлисларда ҳам эътироз бўлиши табиий. Аммо унутмаслик керакки, буларнинг барчаси Ўзбекистонда футболни ривожлантириш учун қилинмоқда. Шунинг учун ислоҳотларни бошлашни кечиктириб бўлмасди.
Олдимизда катта мусобақалар турибди. 2020 йилда Токиода Олимпиада, кейин жаҳон чемпионати келади. Бу мусобақаларга йўлланма олиш учун лигамизни тезроқ ривожлантиришимиз керак», дея гапириб ўтди Ғофуров «Спорт» телеканалининг GOL кўрсатуви жонли эфирида.