Энди аэропорт атрофидаги «Учар такси»лар йўқ бўлади
Ўзбекистон Республикаси Президенти Шавкат Мирзиёев раислигида 22 февраль куни видеоселектор йиғилиши ўтказилди. Унда хорижий туристлар оқимини кўпайтириш ва ички туризмни янада ривожлантириш, сайёҳлик хизматларини яхшилаш ва турларини кенгайтириш бўйича кўрилаётган чоралар натижадорлиги танқидий таҳлил қилинди.
Президент матбуот хизмати берган хабарга кўра, президент йиғилиш вақтида сайёҳларнинг кайфиятига таъсир қиладиган энг кичик жиҳатларгача эътибор қаратди.
Хабар қилинишича, Шавкат Мирзиёев аэропортлар залларидаги чироқлар хиралиги, паспорт назорати кабиналари тўлиқ ишламаслиги, узундан-узоқ сунъий навбатлар, такси хизмати кўрсатувчи хусусий автомобиль эгаларининг тартибсизлиги каби ҳолатларни яхшилаш бўйича ҳам топшириқлар берган.
Қайд этиш керакки, шу вақтгача Тошкентга келган меҳмонларни аэропорт ташқарисида кутиб турувчи хусусий таксичилар мижозларни меъёридагидан бир неча баробар юқори нархларда манзилга элтишга одатланган, баъзида иш фирибгарлик даражасига етиб борган. Бу эса шаҳар меҳмонлари ва сайёҳларда ёқимсиз таассуротлар қолдириб келмоқда.