Беларусда "Озодлик куни"ни нишонлашга чиққан ўнлаб фаол қўлга олинди (ВИДЕО)
Беларус пойтахтида мамлакатнинг Россиядан озод бўлгани 100 йиллигини нишонлашга чиққан ўнлаб фаол ҳибсга олинди.
1918 йилнинг 25 мартида Беларус Россиядан ажралиб чиққан ва янги тузилган Беларус халқ республикаси 1 йил ҳукм сурган эди.
Минскда мухолифат фаоллари "Озодлик куни"ни нишонлаб, кўча юришига чиқди ва амалдаги президент Лукашенкани мамлакатни руслаштиришда айблади.
Vyasna инсон ҳуқуқларини ҳимоя қилиш гуруҳининг хабар қилишича, 30 га яқин фаол 25 март кунги акция чоғида ҳибсга олинган.
Президент Лукашенка сўнгги 24 йил ичида илк бор бу йил бу санани байрам сифатида нишонлашга рухсат берди. Аммо, Минскда байрам тадбирлари бўлиб турган бир кезда, мухолифатнинг норозилик маршига рухсат берилмади.
Ҳукумат рухсат берган тадбирларда минглаб одам қатнашди, уларнинг қўлларида 1918 йилда тузилган республикага оид қизил ва оқ рангда байроқлар бўлди.