Gulnora Karimovaning advokati yana Toshkentda. U mijozi ishi bo‘yicha Toshkent bilan “murosa”ga erishmoqchi
Gulnora Karimovaning Shveysariyadagi advokati Grégoire Mangeat chorshanba¸ 20 iyun kuni yana Toshkentga keldi. Shveysariyadagi asosan moliyaviy jinoyatlarga oid ish bo‘yicha ixtisoslashgan Mangeat Attorneys at Law advokatlik shirkati asoschisi va rahbari bo‘lgan Grégoire Mangeatning bu galgi Toshkent safarida unga hamkasblari Fanny Margairaz va Alice Parmentier hamrohlik qilmoqda.
Shveysariyalik uchala advokat 21-22 iyun kunlari 2015 yil avgustida 5 yilga "ozodligi cheklangan"¸ayni paytda qo‘shimcha ayblar bo‘yicha tergov amaliyotlari davom etayotgan Gulnora Karimova bilan bevosita uchrashmoqda.
O‘zbekiston Bosh prokuraturasi¸ shveysariyalik advokatlarning o‘z mijozi bilan uchrashishiga to‘sqinlik yo‘qligini bildirdi.
Joriy yilning 25-26 aprel kunlari o‘z mijozi bilan Toshkentda¸ O‘zbekiston Bosh prokuraturasi binosida yakkama-yakka uchrashgan Grégoire Mangeatning Ozodlikka aytishicha¸ o‘zbek rasmiylari o‘zi va hamkasblarining 21-22 iyun kunlari Karimova bilan uchrashib¸ o‘z ishini davom ettirishiga ruxsat bergan.
Bundan avval Grégoire Mangeat Karimova bilan 2016 yil dekabrida birinchi marta uchrashgan va keyingi bir yarim yil davomida o‘z mijozini bevosita ko‘rishga muvaffaq bo‘la olmay kelayotgan edi.
20 iyun kuni - Toshkentga uchib ketishi arafasida Ozodlik bilan suhbatlashgan shveysariyalik advokat O‘zbekiston hukumati¸ xususan mamlakat Bosh prokuraturasining keyingi oylarda Karimova ishiga nisbatan pozitsiyasi o‘zgarayotganini olqishladi va bunday o‘zgarish sababini izohlashga urindi.
- O‘zbekiston hukumati keyingi oylar davomida Gulnora Karimovaning Shveysariya banklarida muzlatilgan pullarining bir qismi yoki hammasini olish uchun biz bilan hamkorlik qilish lozimligini tushunib etdi. Ular menga o‘z ishimni qilishga imkon berish o‘zlariga nisbatan e’tirozlarni kamaytirishi va ularning pulni olish shansini oshirishini anglab etdilar. Ayni shuning oqibatida mening aprel oyida Gulnora Karimova bilan uchrashishimga ruxsat etildi va bu jarayon joriy hafta yana davom etmoqda¸ dedi 20 iyun kuni Toshkentga uchib ketishi oldidan Ozodlik suhbatlashgan shveysariyalik advokat.
Gulnoraning tutqunlikda hayoti
Grégoire Mangeat Ozodlik bilan suhbatda aytishicha¸ to‘rt yilcha avval qamoqqa olingan Gulnora Karimovaning birinchi ikki yarim yil mobaynidagi (otasi – prezident Islom Karimov tirikligida – tahr.) tutqunlikdagi hayoti nihoyatda og‘ir bo‘lgan.
Advokatga ko‘ra¸ Gulnora Karimova “Toshkentdan taxminan uch soatlik masofada bo‘lgan qamoqxonada” saqlanmoqda.
Gulnora Karimovaning qamoqxonadagi vaziyati va umuman uning ishiga munosabat Shavkat Mirziyoev hokimiyatga kelgandan so‘ng¸ ayniqsa¸ MXXning huquq tizimlari faoliyatidagi rolini keskin kamaytirganidan so‘ng biroz yaxshilanganini e’tirof qilgan Grégoire Mangeat¸ ayni paytda mijozining hozirgi ahvolini ham “juda yomon” deb baholadi.
Karimova bilan 25-26 aprel kunlari bir necha soat davomida yakkama-yakka suhbatlashgan Grégoire Mangeat¸ uning o‘z ishidagi mavhumlikdan qattiq iztirobda ekani¸ o‘zgaruvchan kayfiyat¸ charqoq va dori ta’sirida bo‘lgani bois¸ suhbat davomida diqqatini yig‘ishga qiynalganini aytadi.
- Ammo u jasoratga to‘la va o‘ziga qo‘yilayotgan ayblarni inkor qilmoqda¸ deydi jumladan advokat.
Gulnora Karimovaning qamoqxonadagi sharoitini “juda yomon” deb ta’riflagan advokat¸ bu masalani O‘zbekiston Bosh prokuraturasining o‘zi uchrashgan mas’ullari bilan muhokama qilganini qo‘shimcha qildi.
Karimova advokati prezident Shavkat Mirziyoev bilan uchrashish istagida
Grégoire Mangeat Ozodlik bilan suhbatda Gulnora Karimovaning qamoqdagi vaziyatida jiddiy o‘zgarish qilishi mumkin bo‘lgan shaxs – O‘zbekiston prezidenti bo‘lgani bois¸ hozirgacha ikki marta Shavkat Mirziyoev bilan uchrashishga ruxsat so‘raganini bildirdi.
- Bu¸ himoyachi advokat sifatida¸ mening shaxsiy tashabbusim¸ Gulnora mendan buni so‘ragani yo‘q. Men uning qamoqxonadagi sharoitini prezidentga yetkazmoqchiman¸ unga nisbatan bo‘layotgan zo‘ravonlik¸ ishdagi mutlaq mavhumlikning qabul qilib bo‘lmas holat ekanini tushuntirmoqchiman. Himoyachi advokatlarning ishi¸ mijozga nisbatan O‘zbekistonda ochilgan jinoiy ish hujjatlari bilan tanishishga ruxsat yo‘qligidan¸ nihoyatda qiyin¸ deydi Grégoire Mangeat.
Gulnora Karimova “murosaga borishi mumkin”
Bu ishda hamma uchun maqbul to‘xtamga kelish maqsadida¸ hozirga qadar o‘ziga qo‘yilayotgan ayblarni rad etib kelayotgan Gulnora Karimova ham “ayrim murosaga borishi mumkin”¸ deydi sobiq 1-qizni himoya qilayotgan advokatlar guruhi rahbari.
- Men himoyachi sifatida o‘z ishimni bajarishim uchun tutqunlikdagi mijozimga xalqaro standartlarga mos keladigan adolatli sharoit yaratib berilishi uchun kurashaman. Agar O‘zbekiston hukumatining niyati shunchaki Karimovaning boyliklarini olish bo‘lsa¸ biz bunga qarshilik qilamiz va kerak bo‘lsa¸ Strasburgdagi Yevropa inson haqlari sudigacha boramiz¸ deydi Karimova advokatlar guruhi rahbari.
Unga ko‘ra¸ himoyachilar guruhi xalqaro maydonda katta shov-shuvga sabab bo‘lgan Gulnora Karimova ishi bo‘yicha ham marhum prezidentning qizi¸ ham O‘zbekiston Respublikasi uchun manfaatli yechim topish ustida ishlamoqda va bu jarayon nihoyasida Karimovaning qamoqdan ozod etilib yangi hayot boshlashi¸ uning shaxsiy boyliklarining qaytarib berilishiga umid qilmoqda.
Ozodlik Gulnora Karimova advokati suhbat davomida tilga olgan e’tirozlarga munosabat bildirishni so‘rab O‘zbekiston Bosh prokuraturasi matbuot xizmatiga murojaat qildi. Matbuot xizmati Gulnora Karimova advokatining o‘z mijozi bilan ishlashiga to‘sqinlik yo‘qligini bildirish bilan cheklandi.
Marhum prezident qiziga qo‘yilgan va qo‘yilayotgan ayblar
2017 yilning 28 iyul kuni O‘zbekiston Bosh prokuraturasi Gulnora Karimova ishiga oid tafsilotlarni jamoatchilikka ochiqlagan edi.
Unga ko‘ra¸ Jinoyat ishlari bo‘yicha Toshkent viloyati sudining 2015 yil 21 avgustdagi hukmi bilan G.Karimova ayblanayotgan jinoyatlarni sodir etishda aybdor deb topilgan va unga 5 yil muddatga ozodlikni cheklash jazosi tayinlangan.
Rasmiy bayonotda aytilishicha¸ "G.Karimovaga nisbatan uyushgan jinoiy guruhga qo‘yidagi jinoyatlarni sodir etishga ko‘maklashish holatlari bo‘yicha alohida ish yurituvga ajratilgan jinoyat ishi yuzasidan tergov harakatlari davom ettirilmoqda".
"Ushbu holatlar bo‘yicha G.Karimovaga O‘zbekiston Respublikasi Jinoyat kodeksining 168, 178, 182, 189, 228 va 243-moddalari bilan ayblov e’lon qilingan va unga nisbatan qamoqqa olish tarzidagi ehtiyot chorasi qo‘llanilgan".