АҚШнинг Луизиана штатидаги Шривпорт шаҳрида яшовчи Роберт Страуд онасидан қолган нарсаларни кўздан кечираётиб, улар орасидан Эдгар Ли Мастерснинг “Антология Спун-Ривер” китобини топиб олган. Аниқланишича, китоб онаси томонидан 11 ёшида 1934 йилда маҳаллий Shreve Memorial Library кутубхонасидан олинган, бироқ белгиланган муддатда қайтариб берилмаган. Дастлаб Страуд китобни кутубхонага яширинча тарзда ташлаб қўйган, бироқ кутубхона ходимлари китобнинг суратини фейсбукдаги саҳифаларида эълон қилиб, ушбу воқеа шов-шув бўлиб кетгандан кейин ўзини ошкор қилишга қарор қилган. Эркак китобнинг ўз вақтида қайтарилмагани учун жаримани тўлашга рози бўлган. Кутубхонада унга пешвоз чиқиб, жариманинг максимал миқдорини амалдаги қоидалар бўйича 3 доллар килиб белгилашган. Бироқ эркак китобнинг форзацидаги кўрсатилган кутубхонанинг эски қоидаларига амал қилишга қарор қилган. Бу қоидаларга кўра ҳар бир ўтказиб юборилган кун учун жарима 5 центни ташкил қилган ва эркак кутубхонага 1542,65 долларлик чек топширган. Чекнинг топширилиши вақтида кутубхона директори Жон Таггл ушбу воқеа бошқалар учун сабоқ бўлиши мумкинлиги ҳақида ҳазиллашган. Унинг айтишича, кутубхона олинган пулни китобхонларга олинган китобни қайтаришга ҳеч қачон кеч бўлмаслигини эслатиш учун сарфлайди.
