Украина президенти Владимир Зеленскийнинг истеъфоси учун петиция 25 мингдан кўпроқ овоз тўплади. Петиция Зеленский сайтида рўйхатга олинган. Тўпланган овоз президент петицияни кўриб чиқиши учун етарлидир. Петиция муаллифининг таъкидлашича, Украинанинг янги етакчиси “аслида сайловчиларнинг 73 фоиз қўллаб-қувватловини олмаган”, одамлар унга амалдаги раҳбариятдан норозилик сифатида овоз беришган. Петицияда таъкидланишича, Зеленскийнинг президент сифатидаги илк баёнотлари ва ҳаракатлари сайловчилари ихлосини қайтарган. Петиция 22 май куни пайдо бўлган, кўриб чиқиш учун зарур бўлган овозни тўплашга 90 кун берилади. Бироқ петиция зарурий 25 минг овозни тахминан бир суткада тўплаган. Аввалроқ президент штаби вакили Денис Монастирский петиция етарлича овоз тўпласа, Зеленский унга ўз муносабатини билдиришини айтганди.
