Ўш милицияси "мол ўғирлаган" ўзбекистонлик “самосуд” қилинганини рад этди
Ўш вилоят милицияси матбуот котиби Жениш Аширбаев 4 январь куни Аравон туманида “мол ўғирлаш учун келган” Ўзбекистон фуқароси маҳаллий аҳоли томонидан “самосуд” қилиниб, аёвсиз калтаклангани тўғрисидаги маълумотни рад этди.
Унинг айтишича, икки ҳамроҳи билан Ўзбекистон-Қирғизистон чегарасини 3 январь куни ноқонуний кесиб ўтганидан сўнг қўлга олинган 38 ёшдаги фарғоналик И.У., дастлабки тергов пайтида “чегарадан ноқонуний ўтаётган вақтда жарга йиқилиб жароҳат олганини, уни ҳеч ким калтакламаганини билдирган ва ўзининг гўёки калтаклангани юзасидан ариза ёзишдан бош тортган”.
Айни пайтда Ўзбекистон фуқароси ҳибсга олинган ва унга нисбатан суд-тиббиёт экспертизаси ўтказилиши белгиланган.
Аввалроқ ижтимоий тармоқларнинг қирғиз сегментида Аравон туманининг Туямўйин қишлоқ ҳукуматига қарашли Керкидон овулида 3 январь куни "мол ўғирлаётган пайтида қўлга тушган" Ўзбекистон фуқароси “самосуд” қилиниб, аёвсиз калтаклангани тўғрисидаги видеолар пайдо бўлган эди.
Расман билдирилишича, ўзбекистонликнинг икки шериги қочиб кетишга муваффақ бўлган.
4 январь куни эрталаб эса Керкидон овулининг 59 ёшли турғуни милицияга ўтган йилнинг 17 декабрида қўрасидан 4 бош қорамол ўғирлангани тўғрисида ариза ёзган.