Ҳафта охиридан Ўзбекистоннинг тўрт шаҳридан Москвага қўшимча рейслар йўлга қўйилади
Жорий йилнинг 6 февралидан эътиборан Ўзбекистоннинг Тошкент, Нукус, Урганч ва Термиз шаҳарларидан Россия пойтахти Москвага қўшимча авиақатновлар йўлга қўйилади. Бу ҳақда Uzbekistan Airways авиаширкати матбуот хизмати маълумот тарқатди.
Авиаширкат қайдича, Тошкент – Москва – Тошкент йўналишидаги авиақатновлар ҳафтасига уч марта – якшанба, душанба ва пайшанба кунлари амалга оширилади.
Шунингдек, Нукус – Москва – Нукус йўналишидаги рейслар якшанба, Урганч – Москва – Урганч йўналишидаги қатновлар пайшанба, Термиз – Москва – Термиз йўналишидаги парвозлар эса душанба кунлари амалга оширилиши қўшимча қилинган.
Аввалроқ Uzbekistan Airways январь ойи охиридан Россия шаҳарларига авиақатновлар сонини кўпайтирмоқчи экани ҳақида хабар қилинган.