“Баунти”даги очиқ саҳна “Кинотеатр” масъулларидан бирининг ишдан кетишига сабаб бўлди

“Кинотеатр” телеканалида ёйинланган “Баунти” фильмида очиқ саҳналар эфирга кетиб қолгани ортидан телеканал масъулларидан бири ишдан олинди. Бу ҳақда Ахборот ва оммавий коммуникациялар агентлиги маълумот тарқатди.

Аввалроқ АОКА жорий йилнинг 31 январь оқшомида эфирга узатилган “Баунти” фильмида очиқ саҳналар кесиб ташланмагани жамоат муҳокамасига сабаб бўлгани, шундан сўнг ҳодиса агентлик томонидан назоратга олиниб, экспертлар тайинлангани ва дастлабки ўрганиш ишлари олиб борилаётгани, бунга оид хулоса асосида “Кинотеатр” телеканалига тақдимнома ҳамда Бош прокуратурага ҳуқуқий баҳо бериш учун маълумот киритилишини очиқлаган эди.

Ўрганиш ортидан, АОКА қайдича, “Кинотеатр” телеканалининг Эфирга тайёрлаш гуруҳи масъули А. А. билан тузилган меҳнат шартномаси бекор қилинган ва телеканал мутасадди раҳбари Н.Б.га “ҳайфсан” берилган.

“Телеканал Бадиий кенгаши томонидан теледастурлар савияси экспертлар иштирокида атрофлича ва танқидий руҳда муҳокама қилинди. Келгусида бу каби ҳолатларга йўл қўймаслик юзасидан ташкилий, ижодий-техник чора-тадбирлар белгиланди”, дейилган агентлик хабарномасида.

Янги зеландиялик режиссёр Рожер Дональдсон томонидан суратга олган “Баунти” фильми денгиз саёҳати мавзусига бағишланган бўлиб, унинг саҳна юзини кўрганига яқинда 40 йил (1984) тўлади.

Ўзбекистонда телеканаллар орқали ёйинланаётган фильмлардаги очиқ саҳналар юзасидан эътироз биринчи марта кузатилаётгани йўқ. Шундай эътирозларнинг сўнггиларидан бири Sevimli телеканали орқали шу йил 14 январь куни намойиш қилинган “Сабрия” сериалидаги қизни зўрлаш саҳнаси бўлган. Ҳодисадан бир кун ўтгач, телеканал бош директори ва бош муҳаррири вазифасидан бўшатилган, сериал эса тўхтатилган. Фильм ижодкорлари ва Sevimli телеканалига яқин манбалар сериалнинг тўхтатилишига Ўзбекистон президенти тўнғич қизи Саида Мирзиёеванинг аралашуви сабаб бўлганига ишонишади.