Тошкентда 5-қаватдан тушиб кетган 18 ёшли йигитнинг ҳаёти сақлаб қолинди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: ССВ матбуот хизмати Республика шошилинч тиббий ёрдам илмий марказида мураккаб жарроҳлик амалиёти муваффақиятли ўтказилиб, 5-қаватдан тушиб кетган йигитнинг ҳаёти сақлаб қолинди, деб хабар беради ССВ матбуот хизмати. Маълум қилинишича, 23 февраль куни бемор А. (2004 йилда туғилган) оғир ҳолатда тез тиббий ёрдам машинасида РШТЙИМ қабулхонасига олиб келинган. Бемор қурилиш объектининг 5-қаватидан йиқилиб тушгани сабабли жароҳат олгани аниқланган. У зудлик билан шок залига ётқизилиб, марказ мутахассислари томонидан бош мия, бўйин, кўкрак ва бел умуртқа поғонаси, кўкрак қафаси, қорин бўшлиғи аъзоларида МСКТ текшируви ҳамда қорин бўшлиғи, кўкрак қафасида ультратовуш текширувлари ўтказилиб, беморга ташхис қўйилган. «Тегишли мутахассислар текширувидан сўнг қўйилган ташхис асосида беморда зудлик билан бир неча жарроҳлик амалиётлари ўтказилди. Декомпрессив ляминектомия, айрим умуртқаларни реклинация ва стабилизация қилиш орқали умуртқа поғонасига транспедикуляр система ўрнатиш каби операциялар шулар жумласидан. Юқори савияда ўтган амалиётлар натижасида беморнинг ҳаёти сақлаб қолинди», — дейди марказ директори Дониёр Алимов. Операциядан кейин кўкрак ва бел соҳаси МСКТ қилинганда, ҳеч қандай хавф аниқланмаган. Ўтказилган жарроҳлик амалётлари ва даво чоралари натижасида ўсмир йигитнинг умумий аҳволи яхшиланган. Ҳозирда унинг гемодинамик кўрсаткичлари барқарорлашиб, кундан кунга ижобий ўзгаришлар қайд этилмоқда.