Қозоғистонда Нурсултон Назарбоевнинг жияни ҳибсга олинди
Қозоғистонда тўнғич президент Нурсултон Назарбоевнинг жияни Қайрат Сатибалди ҳибсга олинди. У “Қозоқтелеком” миллий телекоммуникация ширкати раҳбари лавозимида ишлаган вақтида жуда катта миқдордаги маблағларни талон-торож қилганликда гумонланмоқда.
Қозоғистон аксилкоррупция хизматига кўра, Сатибалдининг “давлат хавфсизлигига путур етказувчи бошқа жиноятлар”га алоқадорлиги ҳам текширилмоқда.
Қ. Сатибалди – Назарбоевнинг кенжа укасининг ўғли. Forbes Kazakhstan талқинига кўра, у республиканинг энг нуфузли тадбиркорлари рўйхатига киради. Сатибалдининг мол-мулки 163 миллион долларга баҳоланмоқда. Тадбиркор “Қозоқтелеком” акцияларининг қарийб чорак ҳиссасига эгалик қилувчи Skyline Investment Company S.A. оффшор ширкатининг ягона таъсисчиси экани айтилади. Сатибалди ўз вақтида давлат хизматида ҳам ишлаган, хусусан, пойтахт ҳокимининг муовини бўлган.
Шу йил январь ойи бошларида бутун Қозоғистонни қамраб олган оммавий намойишлар иштирокчиларининг асосий талабларидан бири Нурсултон Назарбоевни сиёсий саҳнадан четлатиш бўлган эди. 28 январь куни Назарбоев ўзи 23 йил бошқарган иқтидордаги “Нур Отан” партияси раҳбарлигидан кетган. Кейинроқ амалдаги президент Қасим-Жомарт Тоқаев уни мамлакат Хавфсизлик кенгаши раислигидан четлатиб, бу лавозимни ўзи эгаллаган, шунингдек “Нур Отан” партиясига раис бўлиб сайланган. Қозоғистон парламенти эса мамлакат сиёсатининг асосий йўналишларини Назарбоев билан келишишни тақазо этувчи қоидаларни бекор қилиш назарда тутилган тузатишларни қабул қилган.
Январь воқеаларидан сўнг биринчи президентнинг қизи Дариға Назарбоева парламент депутати ваколатларини топширган. Шунингдек, Назарбоевга яқин қатор юқори мартабали мулозимлар ва тадбиркорлар ҳам давлат лавозимларидан четлатилган.