«Эзгу мақсад» халқаро хайрия жамоат фонди 208 кишига даволаниши учун маблағ ажратди
Бугун Ахборот ва оммавий коммуникациялар агентлигида «Эзгу мақсад» халқаро хайрия жамоат фонди томонидан ташкил этилган матбуот анжуманида журналистларга мазкур жамоат фондининг 5 йиллик фаолияти, у билан ҳамкорликда ишлаётган шифохоналарда аҳолининг саломатлигини тиклаш, уларни ижтимоий ҳимоя қилиш борасида амалга оширилаётган ишлар хусусида батафсил маълумот берилди.
Мамлакатимизда аҳолининг эҳтиёжманд қатламларини ҳимоя қилиш тизимини такомиллаштириш мақсадида Ўзбекистон Республикаси Президентининг 2017 йил 14 июлдаги «Эзгу мақсад» ҳалқаро хайрия жамоат фондини ташкил этиш тўғрисида”ги ПҚ-3135-сон қарори асосида «Эзгу мақсад» халқаро хайрия жамоат фондини ташкил этилган.
Фонд аҳолининг ҳимояга муҳтож қатламлари, аввало, бемор ва ногирон болалар саломатлигини муҳофаза қилиш, уларга тиббий ёрдам кўрсатиш сифатини оширишни таъминлаш, ижтимоий аҳамиятга эга касалликларни эрта аниқлаш, уларни профилактика қилиш ва даволаш, ногиронликни реабилитация қилиш ва олдини олиш бўйича самарали ишлаб келмоқда. Бундан ташқари аҳолининг ижтимоий ҳимояга муҳтож қатламлари, кўп болали оилаларни қўллаб-қувватлаш, маҳаллаларда ижтимоий инфратузилмани ривожлантириш, фуқароларнинг ўзини ўзи бошқариш органлари ва нодавлат нотижорат ташкилотлари билан ҳам ўзаро ўзаро ҳамкорлик қилиб келмоқда.
Хусусан, Фонд юқорида келтирилган қарордаги белгиланган вазифларга биноан 2017 йил август ойидан ўз фаолиятини бошлаган фонд ҳисоб-рақамига (2022 йил 1 январь ҳолатига) 59.3 млрд.сўм ва 670 минг АҚШ доллари миқдорида Ўзбекистон Республикасида фаолиятини юритаётган юридик ва жисмоний шахслардан, ҳамда хорижий ташкилотлардан маблағ келиб тушган. Ушбу маблағлар фақат хайрия мақсадларида сарфлаб келинмоқда.
2017-2021 йиллар давомида фонд томонидан 208 нафар кишига, шу жумладан ногиронлиги бор болаларга ҳаётини сақлаб қолиш ва тўлақонли яшашлари учун зарур бўлган даволанишларига пул маблағлари ажратилган.
Тиббиётнинг турли соҳалари бўйича мураккаб жарроҳлик амалиётларининг республика касалхоналарида ўтказилишига моддий ёрдам учун Фонд томонидан зарур миқдорда маблағ ажратилиб, ижтимоий кам таъминланган аҳолининг саломатлигини тиклаш борасида қатор ишлар амалга оширилиб келинмоқда.
Бундан ташқари, қаровсиз қолган кекса инсонларга кўмаклашиш, маҳалларда ижтимоий инфратузилмани ривожлантириш борасида: уларни даволаш, хонадонларини таъмирлаш ишларига, “Мурувват” уйлари ва ихтисослаштирилган таълим муассасалаларини зарурий жиҳозлар билан таъминлаш ишлари учун ҳам Фонд зарур миқдорда маблағ билан таъминлаб келмоқда.
Ногиронлиги бор шахсларни ижтимоий химоя қилиш, уларни реабилитация қилиш ва уларнинг мамлакат ижтимоий-сиёсий ҳаётида тўлақонли иштирок этишлари учун бошқа нодавлат ва нотижорат ташкилотлар билан хамкорликдаги лойиҳаларга, айнан Ногирон аёллар ассоциацияси; Кўзи ожизлар жамияти; “Мадад” ташкилоти; Ўзбекистон “VETERAN”жангчи фахрий ва ногиронлар Бирлашмаси; “Матонат” ташкилоти ва бошқаларга молиявий ёрдам кўрсатиб келмоқда.