Қурбон ҳайити ва қўшимча дам олиш кунларида тиббиёт муассасалари тун-у кун ишлайди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Соғлиқни сақлаш вазирлиги Ўзбекистонда Қурбон ҳайити байрами муносабати билан 9-12 июл саналарида кетма-кет дам олиш кунлари белгиланди. «Ана шу даврда халқимизнинг хотиржамлиги ҳамда саломатлигини таъминлаш — ўта муҳим масала. Шундан келиб чиққан ҳолда байрам ва қўшимча ишланмайдиган кунларда мамлакатимиздаги тиббиёт муассасалари фаолиятини мувофиқлаштириб бориш мақсадида Соғлиқни сақлаш вазирлигида штаб ташкил этилди», дейилади ССВ хабарида. Байрам ва қўшимча дам олиш кунларида қуйидаги даволаш-профилактика муассасаларида 40 минг нафар тиббиёт тизими ходими қонунда белгиланган тартибда, навбатчилик асосида аҳолига хизмат кўрсатади: - 1010 та оилавий поликлиника, - 923 та оилавий шифокор пункти, - туман, вилоят ва республика миқёсидаги барча шифохоналар, - ихтисослаштирилган тиббиёт марказлари, - тиббиёт олий ўқув юртлари клиникалари. Шунингдек: Республика шошилинч тиббий ёрдам илмий маркази, унинг ҳудудлардаги 13 та филиали ҳамда 182 та аҳоли пунктида жойлашган шошилинч тиббий ёрдам бўлимларида 24 соат давомида навбатчи шифокор ва ҳамширалар фаолият юритади. Ушбу муассасалар зарур дори-дармонлар билан таъминланиб, заҳира ўринлари яратилган. Мамлакат бўйлаб 2724 та тез тиббий ёрдам бригадаси аҳолидан бўладиган чақириқлар учун доимо шай ҳолатда. Бундан ташқари, 227 та туғуруқ, 245 та болалар даволаш муассасалари ҳам узлуксиз иш олиб боради. Республика Call-маркази (1003) орқали тиббиётга тегишли саволларга малакали мутахассислардан тун-у кун жавоб олиш мумкин. Коронавирусга ихтисослашган тиббиёт муассасалари, хусусан, юқумли касалликлар шифохоналари ҳамда ПЗР-тест топширишга мўлжалланган пунктлар фаолият кўрсатади. Санитария-эпидемиология хизматининг марказий аппарати ва ҳудудлардаги 14 та бошқарма ҳамда 203 та аҳоли пунктида жойлашган бўлимларида ҳам 24 соат давомида 200 нафардан зиёд навбатчи шифокор, қарийб 200 нафарга яқин врач-лаборант ва ёрдамчи ходимлар ўз фаолиятини давом эттиради. Соғлиқни сақлаш вазирлиги байрам ва дам олиш кунларида узлуксиз меҳнат қиладиган барча тиббиёт ходимларига ўз миннатдорлигини билдиради.