Зафар Ҳошимов депутатларга президент қарори ижросини таъминлаш бўйича мурожаат йўллади — Бизга қўшилинг: ???? https://t.me/joinchat/AAAAADwt0NGCRoONT4f1_Q
«Korzinka.uz» супермаркетлар тармоғи асосчиси Зафар Ҳошимов депутатлардан Ўзбекистондаги меҳнат фаолияти бўйича қабул қилинган қарор ижросини таъминлашни сўради. Ўзбекистонда 13 млн 600 минг киши банд бўлиб, шундан расмий секторда банд бўлганлар сони 6 млн 100 минг кишини, норасмий секторда 5 млн 700 нафар, чет элда ишлаётганлар сони 1 млн 800 минг кишини ташкил этади. Зафар Ҳошимов мамлакатнинг бутун меҳнатга лаёқатли аҳолисининг деярли ярми норасмий, кафолатланган ҳуқуқсиз, мунтазам маошсиз, эртанги кунга ишончсиз меҳнат қилаётганини таъкидлади. - Бу миллионлаб юртдошларимиз неча соат, қандай шароитда ишлаётгани, уларга таътил ва дам олиш кунлари берилганми йўқми номаълумлигини билдиради, — деб ёзади у. Тадбиркор энг ёмони пенсия масаласи эканлигини, бу одамлар кейинчалик пенсия ёшига етиб, бутун умр меҳнат қилганини исботлай олмаслигини айтган. - Меҳнат бозоридаги ушбу нозик масалага давлат томонидан эътибор қаратила бошлаганидан жуда мамнунман, — деб давом этади Зафар Ҳошимов. Такси ҳайдовчиларига якка тартибдаги тадбиркор мақомининг берилиши камида юз минглаб бу соҳада меҳнат қилувчиларга ўз иш жойларини қонунийлаштириш имконияти ва кафолатларини берди. - Бу миллионлаб норасмий иш билан банд бўлганларнинг аксарияти хизмат кўрсатиш, умумий овқатланиш ва чакана савдо соҳаларида банд, — дейди «Korzinka.uz» супермаркетлар тармоғи асосчиси. Президентнинг 2022 йил 27 январдаги қарори билан иш берувчилар ўз иш жойларини қонунийлаштириш мақсадида иқтисодиётнинг ушбу тармоқларида ягона ижтимоий тўлов миқдорини 12 фоиздан 1 фоизга камайтириш белгиланди. - Бу барча тўсиқларни тубдан бартараф этувчи, миллионлаб ишчиларни норасмий бандликдан формал секторга олиб чиқувчи оқилона қарор. У орқали умумий овқатланиш ва чакана савдо соҳаларида иш ўринларини яратиш ва қонунийлаштириш рағбатлантирилади, — деб ёзади у. Афсуски, апрель ойи бошидан кучга кирган мазкур фармонда кўрсатилган чора-тадбирлар ҳалигача тўлиқ амалга оширилмаяпти. Жумладан, қонунчилар мазкур фармонда белгиланган корхоналарнинг ижтимоий тўловларини камайтириш тўғрисидаги қоидаларини амалдаги Солиқ кодексига киритмаган. Ҳошимовнинг айтишича, ҳуқуқий томондан, фармон қайсидир маънода тўхтатиб қўйилган, у билан бирга норасмий ишлаётган миллионлаб ватандошларимизнинг ҳуқуқлари ва тақдири ҳам. - Депутатларимиздан Президентимиз бошлаган эзгу ишни охирига етказишни, Солиқ кодексининг тегишли бўлимларига қарорда кўрсатилган ўзгартиришларни киритишни сўраб мурожаат қиламан, — деб ёзади Зафар Ҳошимов. Тадбиркор мурожаатини миллионлаб меҳнаткаш ватандошларимизга имконият, ҳуқуқ ва хавфсиз келажакни беринг, дея якунлайди.