Бабаян: "Бугун барча жабҳада рақибдан устун эдик" — Бизга қўшилинг: ???? https://t.me/joinchat/AAAAADwt0NGCRoONT4f1_Q
Cоcа Cоlа Суперлигаси 19-тури доирасидаги "Навбаҳор" – "Қизилқум" учрашувидан сўнг мезбонлар бош мураббийи Самвел Бабаян матбуот анжуманида қатнашди. Ўйин ҳақида Биринчи навбатда мухлисларимизни табриклайман. Чемпионатда кетма-кет учта дурангдан кейин ниҳоят кучли жамоа устидан ғалаба қозондик. "Қизилқум" сафида кучли ижрочилар йиғилган. Бу жамоа билан учинчи марта тўқнаш келдик ва учаласида ҳам ғалаба қозондик. Шу боис йигитларни табриклайман. Бундай ўйинларда биринчи ўринга жамоавий ўйин чиқади. Футболчиларимиз мухлисларга байрам қилиб беришмоқчи эди ва буни уддалашди. Ҳужумчиларимиз ўйинни анча вақтли бизнинг фойдамизга якунлашлари керак эди. Бугун барча жабҳада рақибдан устун эдик. Энди олдинга интилишда давом этамиз, 7 та ўйин биз учун 7 та финалга тенг бўлади. Ҳар бир баҳсда сифатли ўйин намойиш этишга ҳаракат қиламиз. - Мирлан Мурзоев бугун илк бор асосий таркибда майдонга тушди. Аммо бир тайм ҳам имкон бермадингиз. Асабларингиз дош бермадими? - Жамоамиздаги барча футболчилар майдонга тушиши мумкин. Мирланга бугун имкон бердик. Бироз ўхшамади ва кичик жароҳат ҳам халал берди. Мурзоевни Марушичга рақобатчи сифатида жамоага олиб келганмиз. Рақобат бўлмаса, ривожланиш бўлмайди. "Қизилқум" таркибига назар солсангиз, терма жамоа собиқ ёки ҳозирги кундаги аъзоларини учратасиз. Кучли жамоани бир йилда уч марта ютдик, барча йигитларимга "респект"! Асабларга келсак, футбол шундай ўйин, унда доим асабийлашиш бўлади. Агар асаблар дош бермаса, бошқа спорт турларини кўришни тавсия қиламан. "Навбаҳор" узоқ йиллардан кейин илк бор мусобақа жадвалининг юқори қисмида ва кучли жамоаларга рақобатдош бўлмоқда. - Бугун Асад Собиржонов 5+ баҳога ўйнади. Бу нима билан боғлиқ? - Асад ажойиб иқтидор эгаси. Бахтимизга у бизга эркин агент сифатида келган, собиқ клуби уни шундай қўйиб юборганди. Собиржоновни кичкиналигидан биламан, у 22 ёшда ва яқин келажакда терма жамоа мураббийлари эътиборига тушади деб ўйлайман. - Зоран Марушичга қандай баҳо берасиз? У Жиззахда гол ура олмади. - Марушич 7 та гол билан жамоа тўпурари бўлиб турибди. Агар барча вазиятлардан фойдалана олганида, тўпурарлар пойгасида биринчи ўринда бўлиши керак эди. Унга баҳо беришимни сўрадингиз - сифатли ҳужумчи. Шунчаки ҳали қиладиган ишларимиз кўп. - Жиззахда жамоа нега юта олмаганди? - Олдинги учта турнинг барчасида биз ғалабага лойиқ эдик, афсуски, вазиятлардан фойдалана олмадик. Ҳеч бир ўйинда ёмон ўйнамадик. - Жамоа футболчиларига хориждан таклифлар йўқми? - Мақсадимиз — таркибдаги барча футболчиларни сақлаб қолиш ва кейинги йилда ҳам натижа кўрсатиш. Трансфер қилиш эмас.