«Заковат»: бош мукофотни қозоғистонлик «Оддий меҳнаткашлар» олиб кетишди — Бизга қўшилинг: ???? https://t.me/joinchat/AAAAADwt0NGCRoONT4f1_Q
24-25 сентябр кунлари Тошкентда илк бор «Заковат» ўйинининг спорт тури бўйича Марказий Осиё кубоги мусобақаси бўлиб ўтди. Мусобақада Ўзбекистон, Қозоғистон, Қирғизистон, Тожикистон ва Туркманистондан 48 та жамоа иштирок этди. Соврин жамғармаси 200 миллион сўмни ташкил этди. Чемпионат Миллий масс-медиани қўллаб-қувватлаш ва ривожлантириш жамоат фонди ҳамда «Заковат» нодавлат нотижорат ташкилоти ҳамкорлигида ташкил этилди. Тошкент Ботаника боғи мусобақалар ўтказиладиган спорт майдончасига айланди. Бу ерда кубокни юқори савияда ўтказиш, иштирокчиларнинг дам олиш пайтларида қулайлик яратиш учун барча зарур шароитлар яратилди. Ҳар бир мамлакатдан миллий терма жамоалар билан бир қаторда энг номдор жамоалар билан ҳам иштирок этди. Масалан, 2019 йилда интеллектуал ўйинлар бўйича мамлакат чемпиони бўлган «Монополия» жамоаси ўйинчилари Қирғизистон кубоги учун кураш олиб боришди. Қозоғистондан – амалдаги висе-чемпионлар (2019), шунингдек, Марказий Осиё лигасининг иккинчи мавсуми чемпиони «Эрудит» жамоаси курашди. Жумладан, Тожикистон вакили сифатида икки карра висе-чемпион «Авеста» жамоаси қизғин баҳсларда иштиокчиси бўлди. Ўзбекистон терма жамоалари орасида ҳам юлдузлар кўп. Улардан бири бу йил «Заковат» бўйича мамлакат чемпионлигини қўлга киритган ва жаҳон чемпионатида республикамиз номидан заковат юритган «Нима? Қаерда? Қачон?" жамоаси бўлди. Мусобақанинг биринчи кунида «Эрудит квинтети» саралаш ўйинлари, «Брейн ринг»нинг чорак ва ярим финал ўйинлари, шунингдек, «Заковат» ўйинининг икки тури ўтказилди. Иккинчи куни «Эрудит квинтети»нинг ярим финал ва финали, «Заковат»нинг учинчи, тўртинчи ва бешинчи босқичлари ҳамда «Брейн ринг» финали бўлиб ўтди ва якуний ғолибларни аниқлади. Чемпионат ёрқин шоу-дастур билан якунланди, унинг ҳар бир чиқиши Марказий Осиё халқлари маданияти симбиозига асосланган. Кўтаринки аъло кайфият руҳида ғолибларни тақдирлаш маросими бўлиб ўтди. Учинчи ўринни «Мистерия» жамоаси эгаллаб, 40 миллион сўм совриндорига айланди. Мукофотни Ўзбекистон Миллий ахборот агентлиги директори ўринбосари Хушнудбек Худойбердиев топширди. Иккинчи ўринни Ўзбекистоннинг «Биз» жамоаси (Ўзбекистон) қўлга киритди. Уларга 60 миллион сўм пул мукофотини Миллий масс-медиани қўллаб-қувватлаш ва ривожлантириш жамоатчилик фонди директори Нозима Давлетова топширди. Мусобақа ғолиблари – Қозоғистоннинг «Оддий меҳнаткашлар» жамоасига «Заковат» интеллектуал ҳаракат президенти Абдурасул Абдуллаев томонидан 100 миллион сўм миқдоридаги биринчи ўрин мукофоти топширилди. Бош соврин – Кубок учун баҳс олдидан яна бир «режадан ташқари» жамоа – КВН афсонаси «Азиа микс» жамоасининг мафтункор чиқиши бўлди. Бош соврин – Кубок учун кечган баҳсда Ўзбекистон ва Қозоғистон терма жамоалари зукколар баҳсида тўқнаш келишди. Биринчи турда 5 очкогача Ўзбекистон пешқадамлик қилди. Бироқ кейин қозоғистонлик ўйинчилар 2 очкони қўлга киритишди. Шундай бўлсада кейинги саволда бизнинг терма жамоа ғалабани қўлга киритишди. Иккинчи турда жамоалар тенг бўлишди. Бироқ устунлик меҳмонлар томонга ўтди ва ҳисоб 1:1 бўлди. Ҳал қилувчи учинчи турда Қозоғистон жамоаси ғолибликка тўлақонли ҳақли бўлишди. Марказий Осиё ғолибларига Кубокни Ўзбекистон Республикаси Президенти Администрасияси раҳбари ўринбосари Комил Алламжонов топширди. Маълумот учун: Заковат кубоги юқорига интилаётган бешта олтин нур устунини ифодалайди. Ҳар бир устун иштирокчи мамлакат рамзи бўлиб, нурлар азалдан бунёдкорлик қудрати, маънавий маърифат ва бунёдкорлик қуввати рамзини билдиради.