Буркина-Фасода ҳарбийлар йил бошидан бери иккинчи марта давлат тўнтаришини амалга оширди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Global Look Press Буркина-Фасода йил бошидан бери иккинчи ҳарбий тўнтариш содир бўлди, деб хабар бермоқда leFaso. Натижада мамлакатни бошқараётган подполковник Пол-Анри Сандаого Дамиба ҳукуматдан ағдарилди. Давлат тўнтаришидан аввал пойтахт Уагадугунинг бир қанча ҳудудларида отишма содир бўлган. Ҳокимиятни капитан Иброҳим Траоре эгаллади. У конституция ва сиёсий фаолият тўхтатилиши, ҳукумат ва парламент тарқатилиши, чегаралар ёпилиши ҳақида эълон қилди. Бундан ташқари, мамлакатда соат 21:00 дан 05:00 гача комендантлик соати жорий этилди. Reuters хабарига кўра, Дамибанинг ағдарилгани ҳақида ҳарбийлар 30 сентябрь куни кечқурун телевидение орқали маълум қилган. Унинг қаердалиги номаълум. Траоренинг сўзларига кўра, қишки давлат тўнтаришида Дамибанинг ҳокимиятга келишига ёрдам берган ҳарбий гуруҳ уни жангарилар билан кураша олмагани учун лавозимидан четлаштиришга қарор қилган. Худди шу сабабга кўра, Дамиба ҳам ўзидан олдинги Рок Марк Каборни ағдарган эди. Буркина-Фасо Ғарбий Африкадаги энг қашшоқ мамлакатлардан бири бўлиб, аҳолиси тахминан 22 миллион кишини ташкил этади, аҳоли жон бошига ялпи ички маҳсулот эса йилига 988,3 долларга тенг. Reuters агентлигига кўра, «Ал-Қоида» ва ИШИД ташкилотларининг жангарилари мамлакат ҳудудининг бир қисмини назорат қилмоқда. Январь ойи охирида Буркина-Фасо ҳарбийлари телевидение орқали мамлакатда ҳарбий тўнтариш бўлганини эълон қилганди. Каборе ағдарилиб, ҳокимият Дамибага ўтган. Ўшанда Каборе суиқасддан омон қолган эди. ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.