Фарғонадаги тадбирларда жонли ижрода куйлаш бошланди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: «Дарё» Фарғонада Ўқитувчи ва мураббийлар кунига бағишлаб ўтказилган байрам тадбирида барча санъаткорлар жонли ижрода куйлади, дея хабар берди «Дарё». Кеча, 30 сентябрь куни ўқитувчи ва мураббийлар куни муносабати билан Фарғона шаҳридаги «Афросиёб» тантаналар мажмуасида байрам тадбири ташкил этилган. Тадбирда вилоят ҳокими Хайрулло Бозоров, сектор раҳбарлари, вилоятнинг барча шаҳар-туманларидан келган 300 нафардан зиёд ўқитувчи ва мураббийлар, олий таълим муассасалари ректорлари ва профессор-ўқитувчилари, кенг жамоатчилик вакиллари қатнашган. Фото: «Дарё» Тадбирда олий ўқув юртларига кириш кўрсаткичлари юқори бўлган умумтаълим мактаблари директорлари, фахрий устозлар, бугунги кунда таълим тизимининг барча жабҳаларида самарали фаолият олиб бораётган ўқитувчилар ва мураббийларнинг катта гуруҳи вилоят ҳокимлигининг фахрий ёрлиқлари, ташаккурномалари ва эсдалик совғалари билан тақдирланган. Байрам тадбирида йиғилганларга жонли ижродаги концерт дастури тақдим этилди. Илҳом Иброҳимов, Абдужалил Қўқонов, Мардон Мавлонов, Муҳсин Мўминов каби таниқли санъаткорлар, Ўзбекистон давлат филармонияси қошидаги «Лазги» ашула ва рақс ансамбли ҳамда «Зилола» ашула ва рақс ансамбли томонидан жонли ижро этилган куй-қўшиқлар йиғилганларга ўзгача кайфият багишлади. Фото: «Дарё» Аввалроқ Хайрулло Бозоровнинг Фарғона вилояти маданият ва санъат соҳаси ходимлари билан учрашувида вилоят байрам тадбирларида фонограммада қўшиқ айтишни тақиқлаш, ижрочилар саҳнада чолғучилар билан бирга жонли ижрода куйлаши борасида кўрсатма берилганди.