Берлинда «Ўзбекистонлик» фильмининг 2-эпизоди премьераси бўлиб ўтди
Ўзбекистоннинг Берлиндаги элчихонасида «Ўзбекистонлик» халқаро форуми ва хорижда муваффақиятга эришган ватандошлар ҳақида ҳикоя қилувчи «Ўзбекистонлик» фильмининг иккинчи эпизоди премьераси бўлиб ўтди.
Форум икки юз нафардан ортиқ муваффақиятга эришган ватандошларимиз, шунингдек, Европа дипломатлари, бизнесменлар, креатив индустрия вакиллари ва европалик экспертларни бирлаштирди.
«Ўзбекистонлик» форуми Туризм ва маданий мерос вазирлиги томонидан Ёшлар ишлари агентлиги, Экология ва атроф-муҳитни муҳофаза қилиш давлат қўмитаси, Orient Group компанияси ва Uzbekistan Airways миллий авиаташувчиси кўмагида ташкил этилган. Тадбирдан кўзланган асосий мақсад – чет давлатларида яшаб, фаолият олиб бораётган ва турли соҳаларда муваффақиятга эришган ўзбекистонликларни бирлаштириш ҳамда улар билан она ватан ўртасида мулоқот ўрнатиб, ҳамкорлик кўпригини яратишдир. Шунингдек, мамлакатнинг интеллектуал ҳамда иқтисодий салоҳиятини мустаҳкамлашда ҳамкорликдаги лойиҳалар амалга ошириш кўзда тутилган. Форум очилишида Бош вазир ўринбосари, Туризм ва маданий мерос вазири Азиз Абдуҳакимовнинг видеомурожаати намойиш этилди.
Форум доирасида «Aral Dream» халқаро PR-дастури тақдимоти ўтказилди. Унинг ёрдамида тадбир меҳмонлари ўз мобил қурилмаларида янги Araldream.com онлайн-ҳабидан фойдаланиб, Оролбўйи муаммолари ҳамда уларни ҳал этишнинг инновацион йўллари ҳақида тўлиқроқ маълумотга эга бўлишди.
Бундан ташқари, меҳмонларга Оролбўйи муаммосига бағишланган «Шўрхок» қисқа метражли фильми премьераси ҳамда Ўзбекистон халқ артисти Женисбек Пиязов ва Электрооко гуруҳи ижросидаги «Эртанги кун» видеоклипи намойиш этилди.
Форумнинг якунловчи қисмида «Ўзбекистонлик» фильмининг иккинчи эпизоди премьераси намойиш этилди. Ёшлар ишлари агентлиги директори Алишер Саъдуллаев ғоя муаллифи сифатида форум қатнашчилари қаршисида видеомурожаат орқали сўзга чиқди.
Режиссёр Мухлиса Азизова томонидан суратга олинган фильмда Германияда яшовчи икки нафар ўзбекистонлик босиб ўтган мураккаб йўл ва улар эришган ютуқлар ҳақида сўз боради. Улардан бири – Дмитрий Богданов. У дастлаб Тошкентда, кейин эса Берлинда ўқишни тамомлаган. Хориж таълим муассасасида фазовий технологиялар йўналишини танлаган ва бу қарор унинг ҳаётида ҳал қилувчи бўлган.
Бугунги кунда у Илон Маскнинг «Space Х» компанияси учун сунъий йўлдошларни етказиб берувчи ExoLaunch компанияси асосчисидир.
Навоийлик Муштарий Шарифова эса Ўзбекистонда ва хорижнинг University of Applied Sciences in Europe олийгоҳида бизнес ва менежмент йўналишида таҳсил олган. Муштарий Tesla компаниясига ишга кирган илк ўзбекистонлик қиз бўлди.
«Ўзбекистонлик» фильмини Uzbekistan’s Club Youtube-каналида томоша қилиш мумкин.