Жазони ижро этиш департаменти Қаршидаги колониядан маҳкум қочганини тасдиқлади
Ички ишлар вазирлиги ҳузуридаги Жазони ижро этиш департаменти Қаршидаги колониядан 15 октябрь куни маҳкум қочиб кетганини тасдиқлади.
Департамент қайдича, 35-манзил колониясида жинсий тажовуз (ЖКнинг 118-моддаси) айблови бўйича судланиб, жазо ўтаётган П. З. шанба куни соат 18.00 ларда колония ҳудудида йўқлиги аниқланган.
“Қидирув жараёнида маҳкум П. З. рухсатсиз чиқиб кетганлиги ва 20.35 да манзил муассаса ҳудудидан ташқарида эканлиги аниқланиб, муассасага олиб келинган”, дейилган хабарномада.
Айни пайтда Жазони ижро этиш департаменти маҳкумнинг “ушбу тартиббузарлигига ҳуқуқий баҳо берилиб, жазо муддатининг қолган қисмини ўташ учун ёпиқ турдаги колонияга қайтариш масаласи” кўриб чиқилаётганини билдирган.