Эронда 14 минг нафар намойишчилар қатл этилиши мумкин — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: EPA Эронда қўлга олинган намойишчиларни қатл қилишга рухсат берувчи резолюция кўпчилик овоз билан қўллаб-қувватланди, деб хабар бермоқда IOL агентлиги. 290 депутатнинг 227 нафари намойиш иштирокчиларига «қаттиққўллик билан сабоқ бериб қўйиш»ни ёқлаб овоз берди. Резолюция қўлга олинган намойишчиларни қатл қилишга рухсат беради. «Биз суд тизимидан бу жиноятларни амалга оширган шахсларга, жиноятларда ёрдам берган ва исёнчиларни гиж-гижлаганларнинг барчасига қарши қатъий курашишни сўраймиз», — деди қонун чиқарувчилар. Депутатлар намойишчиларнинг хатти-ҳаракатларини одамларни ҳаётдан ва мол-мулкдан маҳрум қилаётган ИШИД террорчиларига қиёслади. Айни пайтда намойишчилар орасидан қарийб 14 минг киши ҳибсга олинган бўлиб, энди уларнинг барчаси ўлим жазоси хавфи остида. ОАВлар маълумотларига кўра, 5 ноябрь ҳолатига намойишлар чоғида 318 киши ўлдирилган, шуларнинг 49 нафари вояга етмаган шахслар бўлган. Шунингдек, 38 нафар ҳарбийнинг ўлими ҳақида хабар берилмоқда. Эрон етакчилари намойишчиларга қарши қатъий чоралар кўришга қарор қилди, акцияларни ташкиллаштиришда эса улар АҚШни айбламоқда. Эрондаги намойишларга нима сабаб бўлди? Эронда намойишлар сентябрь ўрталарида, 22 ёшли Маҳса Аминийнинг ўлимидан кейин бошланди. Полиция уни Теҳронда метродан чиқиш чоғида ҳижобни нотўғри ўрагани учун ҳибсга олган. Кейинроқ Аминийнинг акаси маълум қилишича, полициячилар у билан «қайта тарбиялаш» ишларини ўтказишга ваъда берган. Полиция участкасидан қиз тез ёрдам машинасида олиб кетилган. Шифокорлар қизда юрак хуружи ва инсульт юз берганини билдирган, у бир неча кундан кейин вафот этган. Эрон полицияси бахтсиз ҳодиса юз берганини даъво қилмоқда. Эрон ҳукумати фикрича, норозиликлар «ислом режимини заифлаштириш бўйича душман стратегияси»нинг бир қисмидир, мамлакат армияси эса намойишлар фонида «душманларга қарши курашиш» ва хавфсизликни таъминлаш ниятида. Эрон олий етакчиси Али Хоманаий намойишлар «оддий эронликлар» томонидан ўтказилмаётганини, балки олдиндан режалаштирилганини айтганди, шунингдек, у АҚШ ва Исроилни тартибсизликларни ташкиллаштиришда айблаганди.