Маҳаллабай агентлигида ўйинлар давом этади. Шубҳали тендерлар бўйича барибир шартномалар тузилди
Агентликнинг Тошкент шаҳар бошқармаси тикув машиналари харид қилиш учун ўтказган 4 та тендерда очилганига бир неча кун бўлган МЧЖлар ғолиб бўлганди. Коррупциявий схема эканига шубҳа уйғотадиган бу тендерлар бўйича барибир шартномалар тузилди. Монополия ва коррупцияга қарши курашиш қўмиталари ҳам бу ҳолатларга кўз юммоқда.
Маҳаллабай ишлаш ва тадбиркорликни ривожлантириш агентлигининг Тошкент шаҳар бошқармаси томонидан тикув машинаси хариди учун ўтказилган, умумий қиймати 3,4 млрд сўмлик тендерларда очилганига 1, 2, 3 ва 4 кун бўлган фирмалар, яъни тендер бўлиб ўтаётган вақтда очилган янги корхоналар ғолиб бўлган эди. Kun.uz бу ҳақда 30 ноябрдаги мақолада эътибор қаратганди.
Агентлик ҳолатга 2 декабр куни муносабат билдириб, бу шубҳали харидлар бўйича ўрганиш ишлари бошлангани, текширувга Монополияга қарши курашиш қўмитаси ходимлари ҳам жалб этилганини маълум қилганди. Орадан 18 кун ўтди, лекин текширув натижалари бўйича маълумотлар тақдим этилмади.
Бугунга келиб эса шубҳали тендерларнинг тўрталаси бўйича ҳам шартномалар имзолангани маълум бўлди.
1-ҳолат. 885 млн сўм
888 млн сўмлик тендерда тендер тугашига 4 кун қолганда очилган «SOLD IT 1111» МЧЖ ғолиб деб топилганди, бу корхона билан 6 декабр куни 885 млн сўмлик шартнома тузилган.
2-ҳолат. 701 млн сўм
726 млн сўмлик тендерда тендер тугашига 1 кун қолганда очилган «INTEND 045» МЧЖ ғолиб деб топилганди, бу корхона билан 6 декабр куни 701 млн сўмлик шартнома тузилган.
3-ҳолат. 855 млн сўм
900 млн сўмлик тендерда тендер тугашига 2 кун қолганда очилган «BRAND MIX 777» МЧЖ ғолиб деб топилганди, мазкур МЧЖ билан 6 декабр куни 855 млн сўмлик шартнома тузилган.
4-ҳолат. 905 млн сўм
908 млн сўмлик тендерда эса тендер тугашига 3 кун қолганда очилган «Business Communication Trade» МЧЖ ғолиб деб топилганди, мазкур МЧЖ билан 25 ноябр куни 905 млн сўмлик шартнома тузилган.
Kun.uz бу корхоналарнинг ҳаммаси Фарғона вилоятининг Қўқон шаҳрида жойлашгани, ўзаро яқин қариндошларга тегишли бўлиши мумкинлигига эътибор қаратганди. Қолаверса, тикув машиналари учун 6 млн сўм атрофидаги нарх бозор нархидан қиммат бўлиши мумкинлиги қайд этилганди. Лекин бу ҳолатларнинг ҳеч бирига Монополияга қарши курашиш қўмитаси ҳам, Коррупцияга қарши курашиш агентлиги ҳам эътибор қаратмаяпти.
Агентлик мазкур ҳолатлар бўйича ўрганиш бошлангани ҳақида 2 декабр куни расмий муносабат билдирганди, шартномалар эса 6 декабрда тузилган.
Kun.uz, шунингдек, бу йил Тошкент шаҳар ҳокимлиги ўтказган 6 та фестивал 4 та фирмага бўлиб берилгани ҳақида 12 декабр куни хабар берган эди. Қатор шартномалар тендерсиз тузилгани, қатор тендерлар фестиваллар ўтиб бўлганидан бир неча ой кейин ўтказилгани (пост-фактум), шаҳар ҳокими бу фестивалларга пул ажратиш ҳақидаги қарорларини оммадан яширгани ҳолатлари бўйича ҳам расмий идоралардан муносабат бўлмади.