Фарғонада ҳоким ёрдамчиси сохта ҳужжатлар орқали кредит маблағларини талон-торож қилгани аниқланди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фарғона шаҳри ва Асака туманида имтиёзли кредит маблағларини ўзлаштирган шахслар ва ҳоким ёрдамчиси аниқланди, деб хабар бермоқда Иқтисодий жиноятларга қарши курашиш департаменти. Қайд этилишича, Бош прокуратура ҳузуридаги департаментнинг Фарғона шаҳар бўлими томонидан терговга қадар текширув ўтказилган. Унда «И.» МФЙ бўйича ҳоким ёрдамчиси А.Х. аҳолига имтиёзли кредит олиш учун тавсия қилиш ваколати берилганидан фойдаланиб, «Ш.» ХК раҳбари И.И. ва фуқаро Т.Т. (фирибгарлик жинояти учун судланган) ва бошқалар билан ўзаро тил бириктириб, сохта ҳужжатларни расмийлаштириш орқали ушбу МФЙда яшамайдиган 2 нафар фуқаро номига жами 61,5 миллион сўм имтиёзли кредит ажратишга эришгани аниқланган. У ушбу маблағларни талон-торож қилган. Шунингдек, департаментнинг Асака туман бўлими томонидан ўтказилган терговга қадар текширувда муқаддам фирибгарлик жинояти учун судланган М.Ҳ. «Н.» МФЙ бўйича ҳокимнинг собиқ ёрдамчиси М.Ж. билан ўзаро тил бириктириб, 2022 йилнинг август—октябрь ойларида 7 нафар фуқарога паррандачилик билан шуғулланиш учун 229,7 миллион сўм имтиёзли кредит ажратишга эришгани аниқланган. Таъминотчи корхоналардан товуқларни қабул қилиб олиб, фуқароларга етказиб бермаган. Ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилган. Ҳозирда тергов ҳаракатлари ўтказилмоқда.