Ҳимолайда йўловчи самолёти қулади. Ўнлаб кишилар ҳалок бўлди (видео) — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: EMPICS Непалда йўловчи самолёт қўнишга тайёрланаётган вақтда қулаб тушди. Унинг бортида 72 киши бўлган. Дастлабки маълумотларга кўра, уларнинг ҳеч бири омон қолмаган. Yeti Airlines авиакомпаниясининг пойтахт Катмандудан Покхара шаҳрига парвоз қилган ATR-72 турбовинтли самолёти якшанба куни тонгда Непал халқаро аэропорти яқинида қулаб тушди. Самолётда 68 нафар йўловчи ва экипажнинг тўрт нафар аъзоси бўлган. Расмий шахслар хабар беришича, воқеа жойида 40 кишининг жасади топилган. Ижтимоий тармоқларда тарқалган видеоларда ҳалокат жойида кўтарилган қуюқ тутунни кўриш мумкин. Бошқа бир видеода эса аҳоли яшаш манзили устида пастлаб учаётган самолёт кескин бурилиб шўнғигани акс этган. Непал армиясининг юзлаб аскарлари аэропортдан бир ярим километр масофада, Сети дарёси дарасидаги ҳалокат жойида қутқарув ишларида иштирок этмоқда. «Биз янада кўпроқ одамлар жасадлари топилишини кутмоқдамиз», деган армия вакили Reuters агентлигига ва самолёт ҳалокат чоғида иккига бўлиниб кетганини қўшимча қилган. AFP хабар беришича, ҳалокат жойидан бир неча непаллик тирик ҳолда топилган, улар касалхонага жўнатилган. Уларнинг аҳволи ўта оғир. Мамлакат бош вазири Пушпа Камал Дахал ўз ҳукуматининг фавқулодда йиғилишини чақирган. Мавжуд маълумотларга кўра, йўловчилардан 53 нафари - непалликлар бўлган. Самолётда беш нафар ҳиндистонлик, тўрт россиялик ва икки кореялик бўлган. Шунингдек, йўловчилар орасида Ирландия, Австралия, Аргентина ва Франциянинг бир нафардан фуқаролари бор эди.