Сўм бир йилда долларга нисбатан қарийб 4 фоизга қадрсизланди – Марказий банк
Жорий йил давомида миллий валютанинг алмашув курси динамикаси ички валюта бозоридаги талаб ва таклиф факторлари, шу билан бирга, ташқи ва ички омилларнинг таъсирида шаклланган.
Марказий банк маълумотларига кўра, жаҳондаги геосиёсий кескинликларнинг юзага келиши, савдо ҳамкор давлатлар валюталарининг қадрсизланиши ҳамда аҳоли ва хўжалик юритувчи субъектлари девалвацион кутилмаларининг ортиши фонида ўтган йилнинг март ойи дастлабки ҳафталарида хорижий валютага нисбатан талаб сезиларли даражада ошиши кузатилган.
«Натижада, миллий валюта айирбошлаш курси йил бошига нисбатан 7 фоизгача қадрсизланиши кузатилди. Бунда, пул-кредит сиёсатининг ўз вақтида қатъийлаштирилиши валюта бозорининг барча сегментларида хорижий валютага талабнинг сезиларли даражада пасайишига ва таклифнинг ортишига таъсир кўрсатган бўлса, мослашувчан алмашув курси ташқи шокларнинг салбий оқибатларини юмшатишга хизмат қилди», – дейилади МБнинг 2022 йил учун Ички валюта бозори шарҳида.
Умуман олганда, 2022 йил давомида миллий валютанинг АҚШ долларига нисбатан тебраниши 1 доллар учун 10 801-11 572 сўм диапазонида шаклланган ва 3,9 фоизга қадрсизланган.
1 АҚШ доллари учун энг юқори нарх 2022 йилнинг 18 мартида кузатилган (11 572 сўм).
Марказий банкнинг изоҳ беришича, миллий валюта алмашув курси динамикаси шаклланиши геосиёсий вазиятнинг ўзгариши, ички валюта бозори иштирокчиларининг кутилмалари ҳамда ташқи молия бозорлари конъюнктурасига боғлиқ. Марказий банк дисбаланслар ортиб бориши олдини олиш мақсадида эркин шаклланувчи валюта алмашув курси режимига амал қилиб боради ҳамда олтин-валюта захиралари нейтраллик принципини таъминлайди.