Ўзбекистон ва Словения иқтисодий ҳамкорлик тўғрисида битим имзолади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Инвестициялар, саноат ва савдо вазирлиги Тошкентда «Ўзбекистон – Словения» бизнес-форуми бўлиб ўтди. Унда тегишли вазирлик, идоралар, тармоқ бирлашмалари раҳбарлари ва икки мамлакат ишбилармон доираларининг 100 дан ортиқ вакиллари иштирок этди. Форумда Ўзбекистон делегациясига Ўзбекистон бош вазири ўринбосари Жамшид Хўжаев, Словения делегациясига эса Словения бош вазири ўринбосари - ташқи ишлар вазири Таня Файон бошчилик қилди. Ташқи савдодаги кўрсаткичларни ошириш учун томонлар икки мамлакат ишбилармон доиралари учун зарур қўшимча шарт-шароитларни яратиб бериш масалалари бўйича келишиб олдилар. Эришилган келишувлар бизнес-форум давомида имзоланган Ўзбекистон ва Словения ўртасида иқтисодий ҳамкорлик тўғрисидаги битимда ўз аксини топди. Тақдимот ва ишбилармон доиралари вакиллари ўртасида кечган мулоқотларда автомобилсозлик, бутловчи қисмлар, металл буюмлар, гидравлик турбиналар, насослар, фармацевтика маҳсулотлари биргаликда ишлаб чиқаришда шериклик муносабатларини ўрнатиш истиқболлари кўриб чиқилди. Чорвачилик, боғдорчилик ва уруғчиликни ривожлантириш бўйича қўшма лойиҳаларни амалга ошириш учун агросаноат комплексини яратиш, шунингдек, Словениянинг Mercator Group йирик савдо тармоғи филиали Ўзбекистонда фаолиятини ташкил этиш муҳокама қилинди. Тадбир якунида иштирокчилар Ўзбекистон ва Словения ўртасидаги иқтисодий ҳамкорликни янада кенгайтириш, мустаҳкам ишбилармонлик алоқаларини ўрнатиш, қўшма лойиҳа ва ташаббусларни амалга оширишда тадбиркорларни ҳар томонлама қўллаб-қувватлашга тайёрлигини билдирдилар.