Беларусда давлатга хиёнат учун ўлим жазосини кўзда тутган қонун лойиҳаси қабул қилинди
Беларусь парламентининг Вакиллар палатаси давлатга хиёнат учун ўлим жазосини жорий этиш кўзда тутилган қонун лойиҳасини қабул қилди. Ҳужжатга мувофиқ, ўлим жазоси шаклидаги жазо чораси мансабдорлар ва ҳарбийларга нисбатан қўлланилиши мумкин.
Қонун лойиҳасида инсоният тинчлик-осойишталиги ва хавфсизлиги, жамоат хавфсизлиги, ҳаракат хавфсизлиги, аҳоли саломатлиги ва давлатга қарши жиноятлар содир этганлик учун жарима жорий этишга ҳам кўзда тутилган.
Ҳужжатда мамлакат Жиноят кодексига “Терроризм ташвиқоти” деган янги модда қўшиш таклиф қилинган. Депутатлар фикрича, бу террорчиликни оқлайдиган ахборотни тарқатишнинг олдини олишга кўмаклашиши мумкин.
Бундан ташқари, қонун лойиҳаси Беларусь армияси ва куч тузилмаларини обрўсини тўкувчи ёлғон маълумотларни тарқатиш учун ҳам жавобгарликни жорий этмоқда.
Эндиликда қонун лойиҳаси Республика кенгаши томонидан маъқулланиши ва Александр Лукашенко томонидан имзоланиши лозим.
Беларусь Европа қитъасидаги ўлим жазоси бекор қилинмаган ягона мамлакат бўлиб ҳисобланади. Ўтган асрнинг 90-йилларидан буён мамлакатда 400 дан зиёд ўлим ҳукми ижро этилган.
2021 йилнинг май ойида Александр Лукашенко теракт амалга оширишга қасдланганлик учун ўлим жазосига ҳукм қилишга имкон берувчи қонунни имзолаган эди. Беларусда мухолифат тарафдорларини террорчилик фаолиятида айблаш одатий амалиёт бўлиб ҳисобланади.