Пойтахтнинг маданият бошқармаси мансабдорларига жиноят иши қўзғатилди
Талон-торож қилинган маблағ 8 млрд сўм атрофида. Бажарилмаган ишлар ва кўрсатилмаган хизматлар учун бюджет маблағлари ўзлаштирилган.
Бош прокуратуранинг хабар беришича, Тошкент шаҳар маданият бош бошқармаси томонидан қонунчилик талаблари бузилиб, тендер танловлари ўтказилмасдан, фестивал тадбирларини ўтказиш учун турли фирмалар билан 20 млрд сўмлик тўғридан тўғри шартномалар тузилган.
Ушбу фестиваллар амалда 2022 йилнинг май-сентябрь ойларида ўтказиб бўлинган. Аммо қонун бузилишларни яшириш мақсадида “etender.uzex.uz” махсус ахборот порталига 24 октябрь ва 3 ноябрь кунлари пойтахтда 5 та фестивал тадбирларини ўтказиш ҳақида номигагина эълон ва ҳужжатлар жойлаштирилган ҳамда шартномалар тузилган.
Ўтказилган текшириш жараёнида амалда бажарилмаган ишлар ва кўрсатилмаган хизматлар учун 8 млрд сўмлик бюджет маблағлари талон-торож қилингани аниқланган.
Ҳолат юзасидан Тошкент шаҳар маданият бош бошқармаси мансабдор шахслари ва бошқаларга нисбатан жиноят иши қўзғатилган. Ҳозирда тергов ҳаракатлари ўтказилмоқда.
Kun.uz олдинроқ ушбу мавзуда суриштирув эълон қилганди. Унда айтилгандики, Тошкент шаҳар маданият бош бошқармаси “Tashkent Opera Fest”, “Tashkent Food Fest”, “Tashkent Flower Fest”, “Tashkent Art Week”, “Tashkent Music Fest”, “Tashkent Dance Fest” ҳамда “MuzzDay Fest” фестиваллари учун 18,2 млрд сўм сарфлаган. Қатор шартномалар тендерсиз тузилган. Қўшимча равишда ўтказилган тендерлар фестиваллар ўтиб бўлганидан бир неча ой кейин ташкил этилган ва уларда ҳам тўғридан тўғри шартномани олган фирмалар ғолиб деб топилган.
Фестиваллар асосан 4 та – “Profi Event”, “Media Globe”, “Modern Celebration” ва “Perfect Organizer” фирмаларига бўлиб берилган.