Германияда энг сўнгги учта АЭС ёпилди
Германияда 16 апрелга ўтар кечаси мамлакатда фаолият юритган энг сўнгги учта атом электр станцияси тўхтатилди. Германия АЭСлардан батамом воз кечиш сиёсатини 2011 йилда Япониядаги “Фукусима-1” АЭСида юз берган авариядан сўнг бошлаган эди.
Германияда энг биринчи АЭС 1961 йилда иш бошлаган. 2000 йилда мамлакатда 19 АЭС мавжуд бўлган. Фукусимадаги авариядан сўнг канцлер Ангела Меркель ҳукумати атом энергетикаси хавфли эканини қайд этган ҳолда, босқичма-босқич АЭСлардан воз кечиш сиёсатини бошлаган эди.
Бавариядаги “Исар 2”, Баден-Вюртембергдаги “Некарвестхайм 2” ва Қуйи Саксониядаги “Эмсланд” электр станцияларидаги реакторларни тўхтатиш 2022 йилнинг охирига режалаштирилганди. Бироқ Европа Иттифоқи Россияга жорий этган санкциялар оқибатида юзага келган энергетик инқироз ортидан улардан фойдаланиш муддати узайтирилганди.
15 ва 16 апрель кунлари Германия шаҳарларида АЭС ёпилишига қарши бўлганлар ва АЭСлар ёпилиши тарафдорларининг намойишлари бўлиб ўтди. Сиёсатчилар орасида ҳам бу масалада муроса мавжуд эмас.
YouGov социология институти томонидан ўтказилган ижтимой сўровдан аниқ бўлишича, немисларнинг учдан икки қисми АЭСлардан воз кечилишига қарши. Сўралганларнинг 32 фоизи АЭСлар фаолиятини чекланган муддатга, 33 фоизи эса чекланмаган муддатга узайтириш лозим, деб ҳисоблайди.
Ижтимоий сўровда иштирок этганларнинг 26 фоизигина АЭСлар фаолияти тўхтатилганини олқишлайди.