БМТ Озиқ-овқат дастури қуролли тўқнашувлар ортидан Судандаги фаолиятини тўхтатди
Судандаги қуролли тўқнашувларда Бирлашган Миллатлар Ташкилотининг Озиқ-овқат дастури ходимларидан уч нафари ҳалок бўлди. Шимолий Дарфур вилоятидаги тўқнашувларда ташкилотнинг яна уч ходими яраланди. Хартумдаги аэропортда эса халқаро ташкилотга тегишли самолётга зиён етди.
Ассошиейтед пресс агентлигининг билдиришича, бунинг ортидан Озиқ-овқат дастури Судандаги фаолиятини вақтинча тўхтатмоқда.
Сўнгги хабарларга қараганда икки кундан бери Суданда давом этаётган қуролли тўқнашувларда тинч аҳолидан 61 киши ҳалок бўлди, 670 киши жароҳатланди. Отишаётган томонларда қанча ҳарбий ҳалок бўлгани ҳақида ҳозирча маълумот йўқ.
Суданда генерал Абдул Фаттоҳ ал Бурҳон армияси ва Муҳаммад Ҳамдан Дагало раҳбарлигидаги “Тезкор қўлловчи қўшин” ўртасида қуролли тўнашув бўлмоқда. Бунга бир вақтлар ҳамкор бўлган икки генералнинг ҳокимият учун курашаётгани сабаб бўлди.
“Тезкор қўлловчи қўшин” ва армия 2019 йилнинг апрелида Суданда ҳарбий тўнтаришни амалга ошириб, мамлакатни 30 йил бошқарган президент Умар ал Баширни ҳокимиятдан улоқтирган эди. 2021 йилнинг апрелида эса бу икки қўмондон ҳокимиятни фуқаролик маъмуриятига топширишдан воз кечиб, иккинчи ҳарбий тўнтаришни амалга оширганди.