Москвага учиб борган Мирзиёев Кремлда Путин билан учрашди
Саккизинчи май куни Россияга ошиғич учиб кетган Ўзбекистон президенти Шавкат Мирзиёев Кремлда мезбон президент Владимир Путин билан учрашув ўтказди.
Президент матбуот хизмати маълумотига кўра, суҳбат аввалида икки президент Иккинчи жаҳон урушидаги Ғалабанинг 78 йиллиги муносабати билан “бир-бирини самимий қутлаб, фахрийларимиз, дўст халқларимизга тинчлик, фаровонлик ва равнақ” тилаганлар.
Путин Мирзиёевни Ўзбекистон Конституциясига ўзгартиришлар киритиш бўйича референдум муваффақиятли ўтказилгани билан ҳам табриклаган.
Қайд этилишича, учрашувда кенг қамровли стратегик шериклик ва иттифоқчилик муносабатларини янада мустаҳкамлаш масалалари кўриб чиқилган, устувор йўналишлардаги кўп қиррали амалий ҳамкорликни кенгайтиришга алоҳида эътибор қаратилган.
Кремль матбуот хизмати ёйинлаган қисқа хабарномада эса Мирзиёевнинг Россияга амалий ташрифи Путиннинг таклифига кўра амалга оширилаётгани, сафар чоғида Ўзбекистон президенти Москвадаги Ғалаба парадида иштирок этиши билдирилган.
Мирзиёев Москвага Ўзбекистонда муддатидан илгари президент сайлови ўтказилиши тўғрисида эълон қилиши биланоқ йўл олган. Мазкур сайлов амалдаги президент фармони билан жорий йилнинг 9 июлига белгиланган. Эслатиб ўтамиз, Мирзиёев 2016 йили 8 сентябрида – Ўзбекистоннинг муваққат президенти сифатида иш бошлашидан икки кун аввал (6 сентябрь куни) ҳам Путин билан Самарқандда учрашган эди.
Россия пойтахтида бўлиб ўтажак бу йилги Ғалаба парадида даставвал Қирғизистон президенти Садир Жапаровдан бошқа хорижлик лидер иштирок этмаслиги эълон қилинган эди. Бироқ 8 май куни Москвадаги тадбирларда иштирок этиш учун Мирзиёев ва Жапаровдан ташқари Беларусь, Қозоғистон, Тожикистон, Туркманистон ва Арманистон етакчилари ҳам Россияга сафар қилишгани бирин-кетин очиқланди.