Туркияда бўлиб ўтган сайловларда уч киши ҳалок бўлди
Туркияда президентлик ва парламент сайлови бўлиб ўтаётгани ҳақида хабар берган эдик. TRT телеканалининг хабар беришича,турли вилоятларида сайлов участкаларида уч киши ҳалок бўлган.
Ризе вилоятида ҳукмрон “Адолат ва тараққиёт” партиясининг сайлов комиссияси аъзоси 64 ёшли Шереф Курт ҳушидан кетган ва сайлов қутисига қулаб тушган. Шифокорлар келгунига қадар фуқаролар унга ёрдам беришган. Лекин касалхонада шифокорлар унинг ўлганини эълон қилишган.
Шунингдек, Трабзон вилоятидаги Акчабаат туманида 75 ёшли Айсел Улусой овоз бериш кабинасида ўзини ёмон ҳис қилган ва ҳушини йўқотган. Шифокорлар унинг юрак хуружидан ўлганини эълон қилган.
Трабзон яқинидаги Гиресун вилоятида ҳам 85 ёшли сайловчи сайлов қутиси ёнида бирдан ҳушидан кетган. Докторлар ёрдамига қарамай, уни сақлаб қолишнинг имкони бўлмаган. У ҳам юрак хуружидан вафот этган.