Қозоғистондаги автоҳалокатда тўрт нафар ўзбекистонлик ҳалок бўлди
Қозоғистонда “КамАЗ” юк машинасининг Toyota Ipsum русумли автомобили билан тўқнашиб кетиши оқибатида ўзбекистонлик тўрт киши нобуд бўлди, ЙҲТда жароҳат олган яна икки йўловчи касалхонага ётқизилган.
Озодлик қозоқ хизматининг ИИВдан олинган маълумотга таянган ҳолда хабар қилишича, йўл-транспорт ҳодисаси 20 май куни Қозоғистондаги Доссор-Кулсари-Бейнеу автойўлиниг 133-километрида содир бўлган.
“Ҳалок бўлганларнинг шахсни аниқлаш бўйича иш олиб борилмоқда. Ҳозирча уларнинг Ўзбекистон фуқароси бўлгани маълум, холос. Toyota автомобили ҳайдовчисига йил бошидан буён 10 та баённома тузилган. Бу баённомалардан 8 таси тезликни оширгани учун, иккитаси эса хавфсизлик камарини тақмагани учун тузилган”, дея иқтибос келтирилган хабарда Атирау вилояти полиция департаменти қошидаги патрул полицияси ротаси командири Адилбек Шахметов сўзларидан.
Жорий йилнинг 16 май куни Қозоғистоннинг Ақтўбе вилоятида содир бўлган ЙҲТда икки нафар ўзбекистонлик ҳалок бўлган, 6 киши касалхонага етказилган эди. Март ойи бошида эса яна Ақтўбе вилоятида Cobalt автомобилининг “КамАЗ” билан тўқнашуви натижасида ўзбекистон тўрт киши нобуд бўлган.
Европа Иттифоқи статистика хизмати маълумотига кўра, Қозоғистон йўл-транспорт ҳодисалари энг кўп кузатиладиган мамлакатларнинг илк бешлигига киради. Авариялар кўплиги йўл ҳаракати қоидаларига, хавфсизлик техникасига риоя қилмаслик ҳамда йўллар ҳолатининг қониқарли эмаслиги билан изоҳланади.