Сингапур президенти Ҳалима Яқуб уч кунлик ташриф билан Ўзбекистонда бўлади
Сингапур президенти Ҳалима Яқуб 23-25 май кунлари давлат ташрифи билан Ўзбекистонда бўлади. Президент матбуот хизмати маълумотига кўра, Ҳалима Яқуб Ўзбекистонга ҳамкасби Шавкат Мирзиёев таклифига биноан келмоқда.
Сингапур президенти Ўзбекистонга ташрифи чоғида мезбон президент билан олий даражадаги музокаралар ўтказади.
“Саммит кун тартибидан конструктив сиёсий мулоқотни янада ривожлантириш, минтақавий ва халқаро ташкилотлар доирасида ўзаро қўллаб-қувватлаш, икки мамлакат етакчи компания ва банк институтлари иштирокидаги инвестиция лойиҳаларига кўмаклашиш, маданий-гуманитар алмашинувни кенгайтириш масалалари ўрин олган”, дейилган расмий хабарномада.
Уч кунлик ташриф чоғида президент Ҳалима Яқуб Олий Мажлис сенати раиси Танзила Норбоева, Ўзбекистондаги диний конфессиялар раҳбарлари билан ҳам учрашиши, ишбилармон доиралар бизнес-форумининг очилишида ва қўшма таълим маркази фаолиятининг тақдимотида иштирок этиши айтилган. Сингапур президентининг Самарқандга ҳам сафар қилиши кутилмоқда.
Ўзбекистон президенти Шавкат Мирзиёев жорий йилнинг январь ойи ўртасида Сингапурга давлат ташрифи билан боргани ҳақида Озодлик аввалроқ хабар қилган. Мазкур ташриф янги турдаги орхидеяга “Шавкат Мирзиёев орхидеяси” деб ном берилгани ҳамда Ўзбекистон президентининг гул ёнига тахтача жойлаштиргани билан ёдда қолган эди.