Қашқадарёда вояга етмаган қизларга уйланиб, бир уйда яшаб келган йигитга ҳукм ўқилди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Қашқадарё вилояти Қарши шаҳрида вояга етмаган қизларга уйланиб, бир уйда яшаб келган йигитга ҳукм ўқилди. Бу ҳақда Олий суд матбуот хизмати маълум қилди.
Унга кўра, 2000 йилда туғилган судланувчи 2019 йилда 2004 йил Қарши шаҳрида туғилган вояга етмаган қизга 16 ёшга тўлмаганини билган ҳолда эр-хотин бўлиб яшашни таклиф қилган. Улар қизнинг розилиги билан 2019 йил декабрь ойидан шу кунга қадар бирга яшаб келган. Бу орада 1 нафар фарзандли ҳам бўлган.
Судланувчи 2006 йилда туғилган яна бир вояга етмаган қизга ҳам эр-хотин бўлиб яшашни таклиф қилган. Унинг розилиги билан 2022 йилнинг августидан декабрига қадар ўз хонадонида бирга яшаган, яъни эркак бир уйда 2 нафар хотин билан умумий рўзғор асосида яшаган.
Йигит ўзининг юқоридаги бу ҳаракатлари билан Жиноят кодексининг 126-моддаси 1-қисми (кўп хотинли бўлиш, яъни умумий рўзғор асосида икки ёки ундан ортиқ хотин билан эр-хотин бўлиб яшаш) ва 128-моддаси 3-қисми "а" банди (такроран 16 ёшга тўлмаган шахс билан жинсий алоқа қилиш)да кўрсатилган жиноятларни содир қилган.
У судда айбига тўлиқ иқрорлик, пушаймонлик билдириб, афсусдалигини иккала оиласи билан уларнинг розилиги асосида яшаганини, жабрланувчилардан кечирим сўрашини билдириб, қонуний енгиллик беришни сўради.
Айбдорнинг биринчи хотини барчасини тасдиқлаб, эрига даъвоси йўқлигини билдирган ва суддан енгиллик сўраган. Судланувчи Жиноят кодексининг 126-моддаси ва 128-моддаси 3-қисми “а” банди билан айбли деб топилди ва унга нисбатан 4 йил муддатга озодликни чеклаш жазоси тайинланди.