Сурхондарёда 6 та туман ғаллакорлари мамлакатда биринчи бўлиб ғалла режасини бажарди

Сурхондарё вилоятининг 6 та туманидаги ғаллакорлар Ўзбекистонда биринчи бўлиб ғалла режасини бажарди. Бу ҳақда вилоят ҳокимлиги ахборот хизмати хабар берди.

Таъкидланишича, жорий йил ҳосили учун Ангорда 6500, Бандихонда 4688, Жарқўрғонда 7877, Қизириқда 10190, Музработда 10700 ва Термиз туманида 2900 гектар майдонда маҳаллий иқлим ва тупроқ шароитига мос, эртапишар ва серҳосил навли уруғлар экилган.

“Ҳосилни қисқа фурсатларда йиғиштириб олиш ишлари оқилона ташкил этилиши натижасида жорий йил 1 июнь ҳолатига Ангорда 9171, Бандихонда 13520, Жарқўрғонда 18131, Қизириқда 23437, Музработда 23609 ва Термиз туманида 5809 тонна дон йиғиб олиниб, режа мамлакатимизда биринчи бўлиб ортиғи билан бажарилди”, — дейди ҳокимлик ахборот хизмати раҳбари Муродбек Давлатов.

Таъкидланишича, ўриб олинган майдонларда ўртача ҳосилдорлик 77-80 центнерни ташкил этган.

“Илғор фермер хўжаликлари томонидан бир гектар ғалла майдонидан 100 центнергача ҳосил олинишига эришилди. Кўтарилган хирмонга туманларда фаолият юритаётган кластерлар ва фермер хўжаликлари бирдек катта ҳисса қўшди. Ҳозирда вилоят бўйлаб қолган майдонлардаги ҳосилни йиғиштириб олиш ишлари қизғин давом этмоқда”, — дейди масъул.

Қўшимча қилинишича, бугун вилоят ҳокимлигида ўтказилган тадбирда вилоят ҳокими Улуғбек Қосимов белгиланган режани мамлакатда биринчи бўлиб бажарган 6 та туманнинг сектор раҳбарлари, энг илғор фермер хўжаликлари ва кластерлар раҳбарларини эришилган натижа билан табриклаб, уларнинг самарали меҳнатларини рағбатлантириш мақсадида вилоят ҳокимлигининг совғаларини топширган.